काठमाडौं । भारतीय प्रधानमन्त्री नरेन्द्र मोदीले प्रधानमन्त्री वालेन्द्र शाह (बालेन)लाई धन्यवाद दिँदै नेपाल र भारतबीचको बहुआयामिक तथा ऐतिहासिक सम्बन्धलाई थप सुदृढ बनाउन मिलेर काम गर्ने प्रतिबद्धता व्यक्त गरेका छन्।

भारतको ८०औँ स्वतन्त्रता दिवसका अवसरमा प्रधानमन्त्री शाहले शनिबार बिहान भारतीय प्रधानमन्त्री मोदीलाई सामाजिक सञ्जाल एक्समार्फत शुभकामना दिएका थिए। शुभकामना सन्देशमा शाहले नेपाल र भारतबीचको गहिरो ऐतिहासिक सम्बन्ध, जनस्तरको निकटता तथा सहकार्य आगामी दिनमा अझ बलियो हुँदै जाने विश्वास व्यक्त गरेका थिए।

शाहले लेखेका थिए, ‘नेपाल र भारतबीचका गहिरो ऐतिहासिक सम्बन्ध, जनताबीचको निकट सम्बन्ध र सहकार्य आगामी वर्षहरूमा अझ बलियो हुँदै जाओस्।’

प्रधानमन्त्री शाहको उक्त सन्देशको जवाफ दिँदै मोदीले न्यानो शुभकामनाका लागि धन्यवाद दिएका हुन्।

मोदीले एक्समा लेखेका छन्, ‘प्रधानमन्त्री वालेन्द्र शाह, तपाईंका न्यानो शुभकामनाका लागि धन्यवाद।’

उनले नेपाल र भारतबीचको सम्बन्धलाई अझ सुदृढ बनाउन भारत प्रतिबद्ध रहेको पनि बताएका छन्। मोदीका अनुसार दुई देशबीचको सम्बन्ध केवल कूटनीतिक वा राजनीतिक तहमा सीमित नभई बहुआयामिक तथा युगौँ पुरानो सभ्यतागत सम्बन्धमा आधारित छ।

‘हामी हाम्रा देशका जनताको आपसी समृद्धि र कल्याणका लागि भारत र नेपालबीचको बहुआयामिक तथा युगौँ पुरानो सभ्यतागत सम्बन्धलाई अझ सुदृढ बनाउन मिलेर काम गर्न प्रतिबद्ध छौँ,’ मोदीले भनेका छन्।

प्रधानमन्त्री शाह र मोदीबीचको पछिल्लो सार्वजनिक संवादले नेपाल–भारत सम्बन्धलाई आगामी दिनमा थप सहकार्य र पारस्परिक हितका विषयमा अघि बढाउने संकेत दिएको छ। विशेषगरी दुई देशबीचको ऐतिहासिक, सांस्कृतिक तथा जनस्तरको सम्बन्धलाई आधार बनाएर आर्थिक विकास, पूर्वाधार, व्यापार तथा अन्य क्षेत्रमा सहकार्य विस्तार गर्ने विषय महत्वपूर्ण रहने देखिन्छ।

भारतले शनिबार विभिन्न कार्यक्रम आयोजना गरी आफ्नो ८०औँ स्वतन्त्रता दिवस मनाएको छ। यही अवसरमा नेपालका प्रधानमन्त्री शाहले भारतीय समकक्षी मोदीलाई शुभकामना दिएका थिए।

Originally published on abcnews.com.np.