इलाम । नेकपा (एमाले) का अध्यक्ष केपी शर्मा ओलीले संविधानले सुनिश्चित गरेको आदिवासी जनजातिको अधिकारप्रति आफ्नो पार्टी प्रतिबद्ध रहेको बताएका छन्।

इलामको सूर्योदय नगरपालिका–१० फिक्कलमा शनिबारदेखि सुरु भएको एमालेको जनसंगठन लोकतान्त्रिक आदिवासी जनजाति महासङ्घको केन्द्रीय कमिटी बैठकलाई सम्बोधन गर्दै ओलीले आदिवासी जनजातिको अधिकार, भाषा, संस्कृति र परम्पराको संरक्षण तथा प्रवर्द्धनमा एमाले सधैँ प्रतिबद्ध रहेको बताए।

“सबैको सहअस्तित्वलाई बलियो बनाउँदै राष्ट्रिय एकतालाई थप मजबुत बनाउनुपर्छ,” ओलीले भने।

उनले एमालेले विगतदेखि नै समावेशी लोकतन्त्र, सामाजिक न्याय र समान अवसरको पक्षमा वकालत गर्दै आएको बताए। विभिन्न जातजातिका नाममा विभाजन र द्वन्द्व सिर्जना गर्नुभन्दा सबै समुदायलाई सहअस्तित्वका आधारमा अधिकार र अवसर प्रदान गर्दै राष्ट्रिय हितमा अघि बढ्नुपर्ने उनको भनाइ छ।

समावेशी लोकतन्त्रमा जोड

ओलीले एमालेको नीति समावेशी लोकतन्त्र, सामाजिक न्याय र समान अवसरमा आधारित रहेको स्पष्ट पारे। सबै समुदायका अधिकार र पहिचानको सम्मान गर्दै राष्ट्रिय एकतालाई थप सुदृढ बनाउनुपर्नेमा उनले जोड दिए।

उनले आदिवासी जनजातिका भाषा, संस्कृति तथा परम्पराको संरक्षणसँगै राज्यका अवसरमा समान पहुँच सुनिश्चित गर्नुपर्ने धारणा राखे।

Originally published on abcnews.com.np.