इलाम । नेकपा (एमाले) का अध्यक्ष केपी शर्मा ओलीले आफूलाई अध्यक्षबाट हटाउने प्रयास गरिरहेका पार्टीभित्रका नेताहरूप्रति आक्रोश व्यक्त गरेका छन्। उनले महाधिवेशनले तोकेको विधि र प्रक्रियाबाहिर गएर अध्यक्ष हटाउने प्रयास गर्नु अनुशासनहीनता भएको बताएका छन्।

शनिबार इलामको फिक्कलमा आयोजित लोकतान्त्रिक आदिवासी जनजाति महासङ्घको केन्द्रीय कमिटी बैठकलाई सम्बोधन गर्दै ओलीले पार्टी कार्यालयको क्यान्टिनमा बसेर केही व्यक्तिले आफूलाई हटाउने चर्चा गरिरहेको भन्दै त्यस्ता गतिविधिको कुनै दम नभएको बताए।

‘पार्टी अफिसको क्यान्टिनमा बसेर केही आवाराहरू अध्यक्ष हटाउने कुरा ख्याल हो, ठट्टा हो जस्तो गर्ने,’ ओलीले भने, ‘अध्यक्षलाई हटाउने, पार्टी सदस्य छ कि छैन, उरण्ठेउलाहरू भेला भएका छन्, अध्यक्ष हटाउने!’

उनले आफूलाई हटाउने भन्दै हस्ताक्षर अभियान चलाइएको विषयमा पनि टिप्पणी गरे। ‘अध्यक्ष हटाउने, कहिले हटाउने हो, हटाइदेऊ न,’ ओलीले भने, ‘कोही हस्ताक्षर गर्दै हिँड्या छन्, अध्यक्ष हटाउने। यसका पछाडि केही दम छैन, केही छैन।’

विरोधीको प्रहारबीच पार्टीभित्र विवाद नगर्न आग्रह

ओलीले पार्टीमाथि विरोधीहरूले तीव्र प्रहार गरिरहेका बेला एमालेभित्रै असन्तुष्टि र विवाद बढाउनु उचित नभएको बताए।

‘जतिबेला विरोधीले तीव्र प्रहार गरेको छ, हामीलाई झेल्न मुस्किल भइरहेको छ। सिंगै पार्टी एकजुट भएर सामना गर्नुपर्ने ठाउँमा त्यतिबेलै पार्टीभित्र अध्यक्ष हटाउँछु भन्याछ,’ उनले भने, ‘अहिले यी सबै कुरा बेकारका कुरा हुन्।’

पार्टीभित्र देखिएको यस्तो गतिविधिलाई उनले अनुशासनहीनताको संज्ञा दिए। महाधिवेशनले तोकेको विधि, प्रक्रिया र समयबाहिर गएर गरिने गतिविधिको कुनै अर्थ नरहेको ओलीको भनाइ छ।

चुनावपछि पहिलोपटक पूर्वमा

निर्वाचनपछि पहिलोपटक पूर्वी नेपाल पुगेका ओली शनिबार झापाको चन्द्रगढी विमानस्थल हुँदै इलाम पुगेका हुन्। विमानस्थलमा पार्टी कार्यकर्ता, शुभेच्छुक तथा स्थानीय नेताहरूले उनलाई स्वागत गरेका थिए।

चन्द्रगढीबाट सिधै फिक्कल पुगेका ओलीले लोकतान्त्रिक आदिवासी जनजाति महासङ्घको केन्द्रीय कमिटी बैठकलाई सम्बोधन गरेका थिए। त्यसपछि साँझ इलाम बजार पुगेर जिल्लाका अगुवा कार्यकर्तासँग भेटघाट तथा छलफल गरेका छन्।

ओलीले पार्टीभित्र देखिएको अनुशासनहीनता र अराजक गतिविधिले संगठनको एकता कमजोर पार्न सक्ने भन्दै यस्ता गतिविधि तत्काल रोक्नुपर्नेमा जोड दिएका छन्।

Originally published on abcnews.com.np.