विराटनगर । नेकपा एमालेका अध्यक्ष तथा पूर्वप्रधानमन्त्री केपी शर्मा ओली निर्वाचनपछि पहिलोपटक औपचारिक कार्यक्रममा सहभागी हुन गृहप्रदेश आएका छन्। गएको फागुन २९ गते सम्पन्न निर्वाचनपछि ओली शनिबार झापा हुँदै इलाम पुगेका हुन्।

चन्द्रगढी विमानस्थलमा अवतरण गरेका ओली इलामको फिक्कलतर्फ लागेका छन्। उनले फिक्कलमा हुने लोकतान्त्रिक आदिवासी जनजाति महासङ्घ केन्द्रीय कमिटीको बैठकलाई सम्बोधन गर्ने कार्यक्रम छ।

कार्यक्रममा देशभरबाट महासङ्घका केन्द्रीय सदस्य तथा इलाममा रहेका एमाले नेता–कार्यकर्ताको सहभागिता रहनेछ।

एमाले झापाका सचिव तुलसी कार्कीका अनुसार ओली आज इलाममै बस्नेछन्। इलाम बसाइका क्रममा उनले इलाम, पाँचथर र ताप्लेजुङका अगुवा कार्यकर्तासँग भेटघाट गर्ने कार्यक्रम छ। यस्तै, इलामका व्यापारी तथा बुद्धिजीवीसँग पनि ओलीले भेट गर्ने कार्यक्रम तय भएको कार्कीले जानकारी दिए।

झापाबाट ‘मिसन जनजागरण’ अभियान सुरु

ओलीले आइतबार झापाबाट एमालेको ‘मिसन जनजागरण अभियान’ शुभारम्भ गर्ने भएका छन्। आगामी स्थानीय तह तथा प्रदेश सभा निर्वाचनलाई लक्षित गरी एमालेले अभियान सञ्चालन गर्न लागेको हो।

गत फागुनमा भएको निर्वाचनमा पार्टीले व्यहोरेको पराजयपछि जनतासँगको सम्बन्ध सुदृढ गर्ने र पार्टी संगठनलाई थप चलायमान बनाउने उद्देश्यले अभियान सुरु गर्न लागिएको एमालेले जनाएको छ।

झापाबाट सुरु हुने अभियान देशभरका ७५३ वटै स्थानीय तहका वडा तहसम्म सञ्चालन गरिने एमालेले जनाएको छ।

Originally published on abcnews.com.np.