विराटनगर । नेकपा एमाले र नेपाली कम्युनिस्ट पार्टी (नेकपा) बीच नयाँ सत्ता समीकरणको तयारी अघि बढेपछि कोसी प्रदेश सरकारमा सहभागी नेपाली कांग्रेसका मन्त्रीहरूले राजीनामा दिने भएका छन्।

मुख्यमन्त्री हिक्मतकुमार कार्कीले बुधबार दिउँसो ३ः३० बजे मन्त्रिपरिषद्को बैठक बोलाएका छन्। उक्त बैठकपछि कांग्रेसबाट सरकारमा सहभागी मन्त्रीहरूले सामूहिक रूपमा राजीनामा दिने कांग्रेस संसदीय दलका प्रमुख सचेतक गोपाल तामाङले जानकारी दिए।

तामाङका अनुसार कांग्रेसले आफ्ना मन्त्रीहरूलाई बुधबार नै राजीनामा दिन निर्देशन दिएको छ।

हाल कोसी सरकारमा कांग्रेसबाट भौतिक पूर्वाधार विकासमन्त्री प्रदीपकुमार सुनुवार, पर्यटन, वन तथा वातावरणमन्त्री भीम पराजुली, उद्योग, कृषि तथा सहकारीमन्त्री इस्राइल मन्सुरी, स्वास्थ्यमन्त्री मानबहादुर लिम्बू र भौतिक पूर्वाधार विकास राज्यमन्त्री शोभा चेम्जोङ सहभागी छन्।

कांग्रेस र एमालेबीचको सत्ता समीकरणमा २०८१ भदौ २८ गते कोसी प्रदेश सरकार गठन भएको थियो। त्यसपछि २०८२ पुस २२ गते मन्त्रिपरिषद् पुनर्गठन हुँदा कांग्रेसका यी नेताहरू मन्त्री बनेका थिए।

नयाँ सत्ता समीकरणको तयारी

एमाले र नेकपाबीच कोसी प्रदेशमा नयाँ सरकार गठन तथा मन्त्रिपरिषद् हेरफेरका विषयमा सहमति भएको बताइएको छ। नयाँ समीकरणअनुसार शुक्रबारसम्म मन्त्रिपरिषद् पुनर्गठन तथा विस्तार गर्ने तयारी भइरहेको स्रोतले जनाएको छ।

कांग्रेसका मन्त्रीहरूको राजीनामासँगै वर्तमान एमाले–कांग्रेस गठबन्धनको कोसी प्रदेश सरकारको अध्याय अन्त्य हुने देखिएको छ।

Originally published on abcnews.com.np.