काठमाडौं । नेपाल टेलिकमको आर्थिक वर्ष २०८२/८३ को चौथो त्रैमासिकसम्मको खुद मुनाफा ४७.५८ प्रतिशतले बढेको छ। कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिमा खुद मुनाफा ८ अर्ब ८६ करोड ४६ लाख रुपैयाँ पुगेको हो।

गत आर्थिक वर्षको सोही अवधिमा कम्पनीको खुद मुनाफा ६ अर्ब ७० करोड ६७ लाख रुपैयाँ थियो। यसअनुसार एक वर्षमा कम्पनीको नाफा २ अर्ब १५ करोड ७९ लाख रुपैयाँले बढेको हो।

कम्पनीको कुल सञ्चालन आय पनि ३.१२ प्रतिशतले वृद्धि भएर ३४ अर्ब ९५ करोड ४ लाख रुपैयाँ पुगेको छ। गत आर्थिक वर्षको सोही अवधिमा कुल सञ्चालन आय ३३ अर्ब ८९ करोड ४५ लाख रुपैयाँ थियो। त्यस्तै, कुल आय २.६५ प्रतिशतले बढेर ३९ अर्ब १९ करोड ९६ लाख रुपैयाँ पुगेको छ।

करअघिको नाफा र EBITDA बढ्यो

समीक्षा अवधिमा नेपाल टेलिकमको करअघिको मुनाफा १३ अर्ब २६ करोड ४७ लाख रुपैयाँ पुगेको छ। गत आर्थिक वर्षमा यस्तो मुनाफा ९ अर्ब ८५ करोड २ लाख रुपैयाँ थियो। यस वर्ष करअघिको नाफा ३ अर्ब ४१ करोड ४५ लाख रुपैयाँ अर्थात् ३४.६६ प्रतिशतले बढेको हो।

त्यस्तै, कम्पनीको EBITDA २० अर्ब ४८ करोड १ लाख रुपैयाँ पुगेको छ। गत वर्षको १८ अर्ब ४९ करोड ६० लाख रुपैयाँको तुलनामा EBITDA १०.७३ प्रतिशतले वृद्धि भएको हो। कम्पनीको वार्षिकीकृत प्रतिशेयर आम्दानी (EPS) ४९.२५ रुपैयाँ रहेको छ।

GSM सेवाको राजस्व बढ्दा सञ्चालन आयमा सुधार

नेपाल टेलिकमका अनुसार ब्याजदर घटेका कारण समीक्षा अवधिमा ब्याज आम्दानी ८६ करोड १९ लाख रुपैयाँ अर्थात् २२.८८ प्रतिशतले घटेको छ। तर, GSM सेवातर्फको राजस्व बढेकाले समग्र सञ्चालन आयमा वृद्धि भएको हो।

GSM सेवाको राजस्व गत आर्थिक वर्षको सोही अवधिको तुलनामा ६४ करोड ५४ लाख रुपैयाँ अर्थात् २.२८ प्रतिशतले बढेको कम्पनीले जनाएको छ।

नेपाल टेलिकमले विकट तथा दुर्गम क्षेत्रमा समेत सञ्चार सेवा विस्तार र गुणस्तर सुधारलाई निरन्तरता दिएको जनाएको छ। कम्पनीका अनुसार यस्ता क्षेत्रमा सेवा विस्तारको लागत तुलनात्मक रूपमा बढी र प्रतिफल कम भए पनि नागरिकलाई सञ्चार सेवाको पहुँचमा ल्याउने उद्देश्यले सेवा विस्तारलाई प्राथमिकता दिइएको छ।

Originally published on abcnews.com.np.