अवलोकनका क्रममा मन्त्री मेहताले प्रतिष्ठान निर्माणका लागि आवश्यक पूर्वाधार, प्रस्तावित जग्गाको अवस्था र आगामी प्रक्रियाबारे जानकारी लिइन् ।

मन्त्री मेहताले रामराजाप्रसाद सिंह स्वास्थ्य विज्ञान प्रतिष्ठानसम्बन्धी ऐन अघि बढिसकेको बताउँदै प्रतिष्ठानलाई व्यवस्थित र प्रभावकारी रूपमा सञ्चालन गर्ने दिशामा सरकार प्रतिबद्ध रहेको बताइन् । प्रतिष्ठान निर्माण भएपछि सप्तरी तथा आसपासका नागरिकले विशेषज्ञ स्वास्थ्य सेवा सहज रूपमा पाउने उनको अपेक्षा छ ।

गजेन्द्रनारायण सिंह अस्पतालको निरीक्षण

मन्त्री मेहताले राजविराजस्थित गजेन्द्रनारायण सिंह अस्पतालको समेत निरीक्षण गरेकी छन् । उनले अस्पतालको सेवा प्रवाह, भौतिक पूर्वाधार र जनशक्तिको अवस्थाबारे जानकारी लिइन् ।

अस्पतालको सेवा विस्तार तथा सुदृढीकरणका लागि आवश्यक चिकित्सक, स्वास्थ्यकर्मी र अन्य जनशक्ति व्यवस्थापनमा मन्त्रालयले समन्वय गर्ने उनले बताइन् ।

भदौभित्र अस्पताल हस्तान्तरण गर्न आग्रह

मन्त्री मेहताले गजेन्द्रनारायण सिंह अस्पतालको हस्तान्तरण प्रक्रिया भदौ मसान्तभित्र सम्पन्न गर्न सम्बन्धित पक्षलाई आग्रह गरेकी छन् ।

अस्पताल हस्तान्तरणपछि आवश्यक चिकित्सक तथा स्वास्थ्यकर्मी परिचालन गर्ने र सेवा विस्तारमा मन्त्रालयले सहजीकरण गर्ने उनले बताइन् ।

स्थानीय नागरिकलाई गुणस्तरीय तथा विशेषज्ञ स्वास्थ्य सेवा सहज रूपमा उपलब्ध गराउन संघ, प्रदेश र सम्बन्धित निकायबीच समन्वय गरी स्वास्थ्य संस्थाको क्षमता अभिवृद्धि गरिने मन्त्री मेहताको भनाइ छ ।