सुन्धाराबाट कालिमाटीतर्फ जाँदै गरेका राजु खत्रीले त्रिपुरेश्वरमा जाम खुलेपछि थापाथलीतर्फको लेनबाट कालिमाटीको लेनमा सिफ्ट गरे । गलत लेन प्रयोग गरेको देखेपछि उनलाई त्रिपुरेश्वर चोकमा खटिएका ट्राफिक प्रहरीले कारबाही गरे ।

उपत्यका ट्राफिक प्रहरी कार्यालयका एसपी नरेशराज सुवेदीका अनुसार दैनिक पाँच सयदेखि एक हजारसम्म सवारी चालक कारबाहीमा पर्ने गरेका छन् । साउन २६ गते मात्रै २४ घण्टामा ७३८ जना चालक कारबाहीमा परेका थिए ।

त्यस दिन मादक पदार्थ सेवन गरी सवारी चलाउने ६३, रातो बत्ती उल्लंघन गर्ने ३८, तीव्र गतिमा चलाउने ९४, लेन उल्लंघन गर्ने १५, सवारी साधनको अवस्था ठीक नभएका १० र एकतर्फी बाटो उल्लंघन गर्ने १० चालक कारबाहीमा परेका थिए । यस्तै, सीसीटीभी फुटेजका आधारमा ८० र अन्य कसुरमा ४०० चालकलाई कारबाही गरिएको थियो ।

कारबाही चित्त नबुझे उजुरी गर्न सकिने

ट्राफिक प्रहरीको कारबाही चित्त नबुझेमा प्रहरीसँग विवाद गर्नुभन्दा कानुनी प्रक्रियामार्फत उजुरी गर्न सकिने व्यवस्था रहेको एसपी सुवेदीले बताए ।

‘कतिपय चालकहरू ट्राफिक प्रहरीको कारबाही चित्त नबुझाएर विवाद गर्न खोज्छन् । त्यो आवश्यक छैन,’ उनले भने, ‘आफू निर्दोष हुँदाहुँदै कारबाही गरिएको जस्तो लागे उजुरी गर्न पाउने व्यवस्था छ । हाम्रो कारबाही नै अन्तिम होइन ।’

यातायात व्यवस्था विभागमा उजुरी

ट्राफिक प्रहरीले यातायात व्यवस्था ऐनअनुसार सवारी चालकलाई कारबाही गर्छ । कारबाही चित्त नबुझे चालकले यातायात व्यवस्था विभागमा उजुरी दिन सक्ने व्यवस्था छ ।

उजुरी परेपछि विभागले कारबाहीबारे छानबिन गर्छ । आवश्यक परे ट्राफिक प्रहरीसँग सोधपुछ तथा कारबाहीस्थलको प्राविधिक अनुसन्धानसमेत गरिन्छ । चालकको उजुरी सही ठहरिए ट्राफिक प्रहरीले गरेको जरिबाना बदर हुन सक्छ ।

विभागको निर्णयसमेत चित्त नबुझे पुनरावेदनका लागि अदालत जाने अधिकार चालकलाई रहेको एसपी सुवेदीले बताए ।

तर, हालसम्म ट्राफिक कारबाहीविरुद्ध कानुनी प्रक्रियामा गएर उजुरी गर्ने चालक भने आफूहरूको जानकारीमा नरहेको उनले बताए।