काठमाडौं । राष्ट्रिय स्वतन्त्र पार्टी (रास्वपा) का सांसदहरूले अब संसद् बैठकमा अनुपस्थित हुँदा वा निर्धारित समयभन्दा ढिलो पुग्दा अनिवार्य रूपमा गुगल फाराम भर्नुपर्ने भएको छ।

रास्वपाका मुख्य सचेतक कविन्द्र बुर्लाकोटीले सोमबार पार्टीका सबै सांसदलाई अनुपस्थितिको सूचना अनिवार्य रूपमा पेस गर्न निर्देशन दिएका हुन्।

नयाँ व्यवस्थाअनुसार सांसदहरू संसद् बैठकमा पूर्ण रूपमा उपस्थित हुन नसकेमा, बैठक सुरु भएको ३० मिनेटपछि मात्र पुगेमा, बैठक सुरु भएपछि बीचमै बाहिरिनुपरेमा वा केही समयका लागि बाहिर गएर पुनः बैठकमा फर्किनुपरेमा गुगल फाराममार्फत जानकारी गराउनुपर्नेछ।

मुख्य सचेतक बुर्लाकोटीका अनुसार सांसदहरूको उपस्थिति व्यवस्थित र पारदर्शी बनाउनुका साथै संसद् बैठकलाई प्रभावकारी बनाउन यस्तो व्यवस्था गरिएको हो।

अब मौखिक जानकारीले मात्र नपुग्ने

यसअघि रास्वपा सांसदहरूले बैठकमा उपस्थित हुन नसक्ने वा ढिलो हुने अवस्था आएमा पार्टी नेतृत्वलाई मौखिक रूपमा जानकारी गराउने गरेका थिए। अब भने त्यस्तो जानकारीलाई औपचारिक अभिलेखमा राख्न अनलाइन फारामको व्यवस्था गरिएको हो।

सांसदले कुनै कारणले बैठकमा उपस्थित हुन नसक्ने अवस्था आएमा वा ढिलो हुने जानकारी पाएलगत्तै गुगल फाराम भर्नुपर्नेछ। बैठक सुरु भइसकेपछि बाहिरिनुपर्ने अवस्था आए पनि त्यसको जानकारी फाराममार्फत दिनुपर्ने व्यवस्था गरिएको छ।

यसले कुन सांसद किन अनुपस्थित भए, कति समय बैठकमा उपस्थित भए वा कुन कारणले बैठकबाट बाहिरिए भन्ने विवरण पार्टीले व्यवस्थित रूपमा राख्न सक्ने अपेक्षा गरिएको छ।

‘उपस्थिति व्यवस्थित गर्न नयाँ अभ्यास’

मुख्य सचेतक बुर्लाकोटीले नयाँ व्यवस्थाले सांसदहरूको उपस्थिति व्यवस्थापनमा सहजता ल्याउने बताएका छन्।

पार्टीले संसद्मा आफ्ना सांसदहरूको सक्रिय सहभागिता र जिम्मेवारीलाई प्राथमिकता दिँदै आएको भन्दै बैठकमा उपस्थितिका विषयमा समेत व्यवस्थित अभिलेख राख्न खोजिएको हो।

संसद्मा सांसदको उपस्थिति, छलफलमा सहभागिता र सरकारका कामकारबाहीमाथि निगरानीलाई प्रभावकारी बनाउने विषय पछिल्लो समय राजनीतिक दलहरूका लागि पनि महत्वपूर्ण बन्दै गएको छ।

रास्वपाले सुरु गरेको यो अनलाइन प्रणालीले सांसदको अनुपस्थिति र बैठकमा सहभागितालाई डिजिटल माध्यमबाट अभिलेख गर्ने नयाँ अभ्यासका रूपमा लिइएको छ।

Originally published on abcnews.com.np.