काठमाडौं । नेपाली कांग्रेसका सभापति गगन थापाले केही दिनअघि आफ्नो घरअगाडि गाडी तेर्स्याउन प्रहरीकै प्रयोग गरिएको दाबी गरेका छन्।

कांग्रेस केन्द्रीय समितिको बैठकपछि आफ्नो धारणा राख्दै थापाले आफ्नो घरमा आगजनी भएको अवस्थामा निजी सम्पत्तिको थप क्षति नहोस् भनेर आफूहरू सचेत रहेको बताए। तर त्यही क्रममा घरअगाडि एउटा गाडी राखिएको र त्यसबारे जानकारी लिन खोज्दा प्रहरीको संलग्नता खुलेको उनको दाबी छ।

“मेरो जलाइएको घरअघि गाडी राखियो। निजी सम्पत्ति थियो, क्षति पुग्नुहुँदैन भन्नेमा सचेत थिएँ,” थापाले भने।

उनका अनुसार परिवारका सदस्यले उक्त गाडी कसको हो भन्नेबारे जानकारी लिन ट्राफिक कार्यालयमा पुगेर प्रश्न गरेका थिए।

“मेरो परिवारका सदस्य ट्राफिक कार्यालय गएर प्रश्न सोध्नुभयो– यो गाडी कसको हो ? हामी जान्न चाहन्छौँ। तर हामीलाई बताइएन,” थापाले भने।

केही समयपछि एक व्यक्ति आफू गाडीको चालक भएको भन्दै त्यहाँ आएको र ती व्यक्ति प्रहरी रहेको थापाको दाबी छ।

“केहीबेरपछि एकजनाले ‘म चालक हो’ भन्नुभयो। चालक बनेर आउने व्यक्ति प्रहरी हुनुहुन्थ्यो,” उनले भने।

‘यो शासकीय अराजकता हो’

थापाले घटनालाई सरकार सञ्चालनमा देखिएको अराजकतासँग जोड्दै कडा आपत्ति जनाए। उनले राज्य संयन्त्रको दुरुपयोग हुने अवस्था रोक्नुपर्ने बताए।

“यो शासकीय अराजकता हो,” थापाले भने, “शासकीय अराजकता रोकिएन भने यसले निल्छ।”

उनले राज्यका निकायहरू कानुन र स्थापित प्रक्रियाअनुसार सञ्चालन हुनुपर्ने भन्दै शासन प्रणालीमा अराजकता हाबी भए त्यसको असर व्यक्ति वा एउटा दलमा मात्र सीमित नरहने चेतावनी दिए।

थापाको यो अभिव्यक्तिले पछिल्लो राजनीतिक घटनाक्रममा राज्य संयन्त्रको भूमिकामाथि कांग्रेसले उठाइरहेको प्रश्नलाई थप सतहमा ल्याएको छ। उनले आफ्नो घरअगाडि गाडी राख्ने घटनामा प्रहरीको कथित संलग्नताबारे थप छानबिन आवश्यक रहेको संकेतसमेत गरेका छन्।

Originally published on abcnews.com.np.