दाङ । दाङमा खाना पकाउने एलपी ग्यासको अभावका कारण उपभोक्ताले घण्टौँसम्म लाइन बस्नुपर्ने समस्या अन्त्य हुने भएको छ। जिल्ला प्रशासन कार्यालय दाङमा सोमबार भएको सर्वपक्षीय छलफलले अब ग्यास वितरण विक्रेतामार्फत व्यवस्थित गर्ने निर्णय गरेको हो।

प्रमुख जिल्ला अधिकारी निश्चलराज पाण्डेको अध्यक्षतामा बसेको बैठकले उपभोक्तालाई आफूलाई पायक पर्ने नजिकको ग्यास विक्रेताकहाँ नाम दर्ता गरी कुपन लिन आग्रह गरेको छ। कुपनका आधारमा पालोअनुसार ग्यास उपलब्ध गराइनेछ।

लामो लाइनका कारण उपभोक्तालाई समस्या हुनुका साथै सुरक्षामा समेत जोखिम बढेकाले ग्यास वितरणको जिम्मेवारी सम्बन्धित विक्रेतालाई नै दिने निर्णय गरिएको प्रमुख जिल्ला अधिकारी पाण्डेले बताउनुभयो। विक्रेताले ग्राहकको नाम, ठेगाना र फोन नम्बरलगायत विवरण अभिलेख राख्नुपर्नेछ।

घोराही बनाऔँ अभियानका संयोजक सविन प्रियासनले नयाँ व्यवस्थाले एउटै व्यक्तिले पटक–पटक ग्यास लिने, पहुँचका आधारमा वितरण हुने तथा वास्तविक उपभोक्ता वञ्चित हुने समस्या नियन्त्रणमा सहयोग पुग्ने बताउनुभयो।

अब ग्यास बिक्रीका लागि सार्वजनिक स्थानमा लाइन नलगाइने भएकाले उपभोक्तालाई कुनै पनि स्थानमा गएर घण्टौँ लाइन नबस्न प्रशासनले आग्रह गरेको छ।

नियमित अनुगमन गरिने

ग्यास वितरण प्रणालीलाई व्यवस्थित बनाउन जिल्ला प्रशासनको अगुवाइमा स्थानीय तह, सुरक्षा निकाय, ग्यास विक्रेता, उद्योगी–व्यवसायी, सञ्चार क्षेत्र तथा नागरिक अभियानका प्रतिनिधिको सहभागितामा नियमित अनुगमन गरिने भएको छ।

स्थानीय तहले वास्तविक उपभोक्ताको पहिचानमा सहयोग गर्ने र ग्यास विक्रेताले उपलब्ध ग्यास पारदर्शी रूपमा वितरण गर्ने प्रतिबद्धता जनाएका छन्।

यसअघि घोराही बनाऔँ अभियान र राष्ट्रिय जनमोर्चा दाङले ग्यास अभाव तथा वितरणमा देखिएको अव्यवस्था समाधान गर्न जिल्ला प्रशासनको ध्यानाकर्षण गराएका थिए।

बैठकमा स्थानीय तहका प्रतिनिधि, ग्यास विक्रेता, नेपाल पत्रकार महासङ्घ, दाङ जिल्ला उद्योग वाणिज्य सङ्घ, घोराही बनाऔँ अभियानलगायत सरोकारवाला पक्षका प्रतिनिधिको सहभागिता थियो। नयाँ वितरण प्रणालीबारे उपभोक्तालाई जानकारी गराउन सूचना प्रकाशन तथा प्रसारण गर्ने निर्णयसमेत गरिएको छ।

Originally published on abcnews.com.np.