काठमाडौँ । राष्ट्रिय स्वतन्त्र पार्टी (रास्वपा) की सांसद रचना खतिवडा खत्रीले आगामी भदौ २३ गते प्रधानमन्त्रीले देशवासीका नाममा सम्बोधन गर्नुपर्ने माग गरेकी छन्।

प्रतिनिधिसभाको मंगलबार बसेको बैठकमा शून्य समयमा बोल्दै उनले ‘जेनजी’ आन्दोलनको एक वर्ष पूरा हुन लागेको अवसरमा प्रधानमन्त्रीले सहिदहरूको सम्मानमा विशेष सम्बोधन गर्नुपर्ने बताइन्।

सांसद खत्रीले भ्रष्टाचार अन्त्य, सुशासन र सुरक्षित भविष्यका लागि युवाहरूले गरेको बलिदानको स्मरण गर्दै आन्दोलनका मागमध्ये कति पूरा भए र कति बाँकी छन् भन्ने विषयमा सरकारले जनतालाई स्पष्ट जानकारी दिनुपर्ने बताइन्।

उनले घाइतेहरूको अवस्था, सहिद परिवारले पाएको न्याय तथा भ्रष्टाचारमा संलग्नहरूमाथि कारबाहीको प्रक्रियाबारे पनि सरकारले स्पष्ट जवाफ दिनुपर्ने बताइन्।

‘देशले जान्नुपर्छ, कति माग पूरा भए, कति बाँकी छन् र भ्रष्टाचारीलाई कारबाही हुन्छ कि हुँदैन ? सरकारलाई राम्रो काम गर्न कसले रोकिरहेको छ र सहिद परिवार एवं घाइतेहरूले कहिले न्याय पाउँछन् ?’ उनले प्रश्न गरिन्।

वर्तमान सरकार भदौ २३ गतेको बलिदानकै जगमा बनेको उल्लेख गर्दै खत्रीले उक्त दिन प्रधानमन्त्रीले देशवासीका नाममा सम्बोधन गरी आन्दोलनका उपलब्धि, बाँकी माग र सरकारको आगामी योजनाबारे स्पष्ट जानकारी दिनुपर्नेमा जोड दिइन्।

उनले भदौ २३ गते सहिदहरूको सम्मान गर्दै प्रधानमन्त्रीबाट देशव्यापी रूपमा सम्बोधन हुने अपेक्षासमेत व्यक्त गरिन्।

Originally published on abcnews.com.np.