काठमाडौँ । नेकपा (एमाले) का सांसद राजेन्द्रकुमार राईले गाँजा खेतीका लागि तत्काल आवश्यक कानुन बनाउन सरकारसँग माग गरेका छन्।

मंगलबार बसेको प्रतिनिधिसभा बैठकमा बोल्दै राईले गाँजा खेतीलाई यसअघि नै कानुनी मान्यता दिइएको भए नेपालको अर्थतन्त्र अहिले थप सुदृढ भइसक्ने धारणा राखे।

‘गाँजा खेतीको कानुन बनाऊँ । विधिसम्मत सञ्चालनको वातावरण बनाउनका निम्ति आग्रह गर्छु,’ उनले भने।

गाँजा खेतीसम्बन्धी कानुन निर्माण भए किसान तथा राज्य दुवैले आर्थिक लाभ लिन सक्ने उनको भनाइ थियो। गण्डकी प्रदेश सरकारले गाँजा खेतीसम्बन्धी कानुन बनाउँदा त्यहाँका नागरिक उत्साहित भएको पनि उनले बताए।

राईले आफूले वार्षिक नीति तथा कार्यक्रममाथि धारणा राख्ने क्रममा गाँजा खेतीलाई कानुनी मान्यता दिनुपर्ने विषय उठाउँदा सरकारले त्यसतर्फ पर्याप्त ध्यान नदिएको गुनासो गरे।

एक सांसदले गाँजाबाट निर्मित कपडा लगाएर संसद् बैठकमा आउने गरेको उदाहरण दिँदै उनले गाँजाको उपयोगका अन्य क्षेत्रलाई स्वीकार गर्ने तर खेतीलाई प्रतिबन्धित राख्नु उचित नभएको तर्क गरे।

‘कपडा लगाउन हुने, गाँजा खेती गर्न नहुने ?’ उनले प्रश्न गरे।

Originally published on abcnews.com.np.