काठमाडौं । प्रतिनिधिसभाको मंगलबारको बैठकमा राष्ट्रिय स्वतन्त्र पार्टी (रास्वपा) की सांसद टिका संग्रौला (ज्वाला) को अभिव्यक्तिलाई लिएर सत्तापक्ष र प्रतिपक्षका सांसदबीच विवाद भएको छ।

विशेष समयमा बोल्दै सांसद संग्रौलाले सरकारले मुलुकलाई भ्रष्टाचार, अनियमितता, बेथिति र ‘गुन्डाराज’बाट मुक्त गर्न खोजिरहेको दाबी गरिन्।

“यो सरकार देशलाई भ्रष्टाचार, अनियमितता, बेथिति र गुन्डाराजको क्यान्सरबाट मुक्त गर्न चाहन्छ,” उनले भनिन्।

उनले आफूहरूले विगतमा गर्न नसकेको काम अब आफूहरूले सरकार सञ्चालन गरेर देखाउने अभिव्यक्ति दिने विपक्षी सांसदप्रति पनि टिप्पणी गरिन्। तत्कालीन सरकारको समयमा भएको गोलीकाण्डमा जेनजी युवाहरू मारिएको उल्लेख गर्दै उनले त्यस्तो पृष्ठभूमि बोकेका नेताहरूले पुनः सरकार सञ्चालनको दाबी गर्दा नैतिक प्रश्न उठ्ने बताइन्।

“कुन हिम्मतले यहाँ आउँछौँ र शासन गर्छौं भनिराख्नुभएको छ?” संग्रौलाले प्रश्न गरिन्।

उनको यही अभिव्यक्तिपछि नेकपा (एमाले) की सांसद साजिदा खातुन सिद्धिकीले आपत्ति जनाइन्। उनले ‘गुन्डाराज’ कहाँ रहेको हो भन्ने स्पष्ट पार्न माग गर्दै वर्तमान सरकारमाथि नै गुन्डाराजको आरोप लगाइन्।

सिद्धिकीले प्रतिपक्षले सरकारका गलत कामको विरोध गर्दा प्रतिपक्षी सांसदलाई नै ‘गुन्डा’को संज्ञा दिने प्रवृत्ति देखिएको भन्दै आपत्ति जनाइन्।

“प्रतिपक्ष देश र जनताको पक्षमा उभिएको छ,” उनले भनिन्, “हाम्रो सास गए पनि उभिन्छौँ, हामी गोली खान तयार छौँ तर सरकारका गलत कार्यमा समर्थन गर्दैनौँ।”

उनले जेनजी आन्दोलनको प्रसंग उठाउँदै सरकार पक्षका सांसदहरूले विगतका घटनाबारे बोल्दा आत्मसमीक्षा गर्नुपर्ने संकेतसमेत गरिन्।

नियमापत्तिपछि सदनमा थप तनाव

विवाद बढेपछि सांसद संग्रौलाले पुनः समय मागिन्। एमालेका सांसद रिंगला यादवसहित केही सदस्यले भने भर्खरै बोलेकी सांसदलाई पुनः नियमापत्ति गर्न दिन नहुने धारणा राखे।

तर बैठक सञ्चालन गरिरहेकी उपसभामुख रुवी कुमारीले नियमापत्ति गर्न मिल्ने भन्दै प्रतिपक्षी सांसदहरूलाई बस्न आग्रह गरिन् र संग्रौलालाई पुनः बोल्ने समय दिइन्।

संग्रौलाले ‘गुन्डाराज’ शब्दप्रति आपत्ति भए तत्कालीन सरकारले इन्काउन्टर गरेका व्यक्तिहरूको सूची देखाउन आफू तयार रहेको बताइन्। उनको यो भनाइपछि प्रतिपक्षका केही सांसदहरू उठेर विरोध जनाएका थिए।

एमाले सांसद रिंगलालगायतले भने संग्रौलालाई पुनः बोल्न दिएको विषयमै आपत्ति जनाए। त्यसपछि उपसभामुखले सांसदहरूलाई एउटै विषय पटक–पटक नदोहोर्याउन आग्रह गरिन्।

एमाले सांसद रिंगलाको पनि आपत्ति

केहीबेरको विवादपछि एमाले सांसद रिंगला यादवलाई बोल्ने समय दिइयो। उनले ‘गुन्डा’ र ‘अराजक’ जस्ता शब्द प्रयोग गरिएको भन्दै आपत्ति जनाइन्।

उनले तत्कालीन सरकारले गुन्डा संरक्षण गरेको भन्ने आरोपप्रति पनि असहमति व्यक्त गर्दै वर्तमान सरकारमाथि पनि प्रश्न उठाइन्।

“अहिलेको सरकारले कति गुन्डा पालेको छ, उहाँलाई थाहा छ कि छैन?” उनले प्रश्न गरिन्।

सांसदहरूबीच आरोप–प्रत्यारोप र नियमापत्तिका कारण केही समय सदनको वातावरण तनावपूर्ण बने पनि त्यसपछि बैठकको नियमित कार्यसूची अघि बढाइएको थियो।

Originally published on abcnews.com.np.