समाचार

काठमाडौँ । अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ–उनसँग पुनः सम्पर्क स्थापित भएको संकेत दिएका छन्। दक्षिण कोरियासँगको संयुक्त सैन्य अभ्यासबाट पछि हट्ने निर्णय सार्वजनिक गरेको भोलिपल्ट ट्रम्पले किमले आफूले गरेको पछिल्लो सम्पर्क प्रयासको जवाफ दिएको बताएका हुन्।

ह्वाइट हाउसमा पत्रकारहरूसँग कुरा गर्दै ट्रम्पले किमसँगको संवाद ‘धेरै सकारात्मक’ रहेको दाबी गरे। किमले आफ्नो सम्पर्क प्रयासको जवाफ दिएको हो कि होइन भन्ने प्रश्नमा उनले ‘हो, उहाँले दिनुभएको छ’ भन्दै पुष्टि गरेका थिए। यद्यपि सम्पर्कको माध्यम र सम्भावित वार्ताका विषयमा उनले थप विवरण दिएनन्।

ट्रम्पले आफ्नो पहिलो कार्यकालमा किमसँग तीनपटक भेट भएको स्मरण गर्दै दुई नेताबीचको सम्बन्धले कोरियाली प्रायद्वीपलाई थप सुरक्षित बनाउन सहयोग गरेको दाबी गरे।

‘म उहाँलाई बुझ्छु र उहाँले मलाई बुझ्नुहुन्छ,’ ट्रम्पले किमसँगको सम्बन्धबारे भने।

दोस्रो कार्यकाल सुरु भएपछि किमसँग प्रत्यक्ष भेट नभए पनि ट्रम्पले आफूले कुराकानीका लागि गरेको प्रयासको जवाफ आएको बताएका हुन्। यसले अमेरिका र उत्तर कोरियाबीच पुनः उच्चस्तरीय संवादको सम्भावना बढाएको संकेत गरेको छ।

दक्षिण कोरियासँग सैन्य अभ्यास फिर्ता

यसअघि ट्रम्पले दक्षिण कोरियासँग हुने संयुक्त सैन्य अभ्यासलाई ‘अनुचित र शत्रुतापूर्ण’ भन्दै पेन्टागनलाई अभ्यास फिर्ता लिन आदेश दिएका थिए।

ट्रम्पले दक्षिण कोरियाले इरानविरुद्धको अमेरिका–इजरायल युद्धमा सहयोग गर्न अस्वीकार गरेको विषयलाई पनि सैन्य अभ्यास फिर्ता लिने निर्णयसँग जोडेका छन्।

दक्षिण कोरियामा करिब ३९ हजार अमेरिकी सैनिक तैनाथ रहेको उल्लेख गर्दै ट्रम्पले उत्तर कोरियाबाट दक्षिण कोरियालाई सुरक्षा दिइरहेका अवस्थामा इरानमा अमेरिकालाई सहयोग गर्न नसकेको भन्दै असन्तुष्टि जनाए।

उनले अमेरिका आफ्ना सहयोगी राष्ट्रहरूको सुरक्षाका लागि मात्रै एकतर्फी रूपमा अघि बढिरहन नसक्ने टिप्पणीसमेत गरेका छन्।

दक्षिण कोरियासँगको संयुक्त सैन्य अभ्यास फिर्ता लिने निर्णय र त्यसलगत्तै किमसँग सम्पर्क पुनः स्थापित भएको ट्रम्पको संकेतले वासिङ्टन र प्योङयाङबीच सम्भावित वार्ताका लागि नयाँ वातावरण बन्न सक्ने देखिएको छ। यद्यपि यसबारे दुवै पक्षबाट औपचारिक वार्ताको घोषणा भने भएको छैन।

Originally published on abcnews.com.np.