कैलाली । सबै कम्युनिष्ट पार्टीबीच एकताका लागि दबाब सिर्जना गर्ने उद्देश्यले पुष्पलाल मित्रता केन्द्रले बुधबार धनगढीमा वृहत् कार्यक्रम आयोजना गर्ने भएको छ।

पुष्पलाल मित्रता केन्द्रका केन्द्रीय अध्यक्ष जगन्नाथ खतिवडाका अनुसार धनगढीस्थित उद्योग वाणिज्य संघको सभाहलमा दिउँसो १२ बजे कार्यक्रम आयोजना हुनेछ। कार्यक्रमको तयारी तीव्र रूपमा भइरहेको उनले बताए।

खतिवडाले आगामी प्रदेशसभा तथा स्थानीय तहको निर्वाचनमा राम्रो परिणाम हासिल गर्न र कम्युनिष्ट आन्दोलनलाई जोगाउन वामपन्थी दलहरूबीच एकता आवश्यक रहेको बताए।

‘वामपन्थी पार्टीहरूको एकता आजको आवश्यकता हो,’ उनले भने, ‘आगामी प्रदेशसभा र स्थानीय तहको निर्वाचनमा राम्रो परिणाम हासिल गर्न र कम्युनिष्ट आन्दोलनलाई जोगाउन पनि यो आवश्यकताबारे बहस हुनेछ।’

नेपाली कम्युनिष्ट पार्टी (नेकपा) का नेता नारायणकाजी श्रेष्ठको प्रमुख आतिथ्यतामा हुने कार्यक्रममा नेकपा, एमालेसहित विभिन्न वामपन्थी दलका नेताहरूले ‘वर्तमान राजनीतिक परिस्थितिमा वामपन्थी दलहरूको भूमिका’ विषयमा विचार प्रस्तुत गर्नेछन्।

विभिन्न दलका नेताको सहभागिता

कार्यक्रममा पुष्पलाल मित्रता केन्द्रका अध्यक्ष जगन्नाथ खतिवडा, नेकपा प्रदेश इन्चार्ज भानुभक्त जोशी, एमाले प्रदेश अध्यक्ष कृष्णप्रसाद जैशी, राष्ट्रिय जनमोर्चाका नन्दराज भट्ट तथा नेकपा संयुक्तका नेता उर्वादत्त पन्तलगायतले सम्बोधन गर्ने केन्द्रका प्रदेश अध्यक्ष हर्कबहादुर शाहले जानकारी दिए।

पत्रकार अर्जुन शाहले पनि वामपन्थी दलहरूको भूमिका र एकताको आवश्यकताबारे टिप्पणी गर्नेछन्।

देशभर विचार गोष्ठी

पुष्पलाल मित्रता केन्द्रले साउन ८ गते काठमाडौंमा सुरु गरेको विचार गोष्ठी अभियानलाई देशका विभिन्न स्थानमा विस्तार गरिरहेको छ। काठमाडौंमा नेकपाका संयोजक पुष्पकमल दाहाल ‘प्रचण्ड’सहितको उपस्थितिमा कार्यक्रम भएको र त्यसपछि नेकपा तथा एमालेबीच सहकार्यको वातावरण बनेको नेताहरूको दाबी छ।

साउन ३० गते कर्णालीमा देव गुरुङको प्रमुख आतिथ्यतामा कार्यक्रम सम्पन्न भएको थियो। धनगढीपछि १३ गते जनकपुरमा माधवकुमार नेपाल र १६ गते इटहरीमा राजेन्द्र पाण्डेको प्रमुख आतिथ्यतामा कार्यक्रम हुने जनाइएको छ। अभियानको अन्तिम कार्यक्रम २७ गते पोखरामा आयोजना गरिनेछ।

पार्टी एकताको लक्ष्य

मित्रता केन्द्रका अध्यक्ष खतिवडाले अभियानले वामपन्थी दलहरूबीच एकताको वातावरण निर्माण गर्ने विश्वास व्यक्त गरे।

‘हाम्रो अभियानले वामपन्थीहरूको एकताको माहोल बन्ने देखिन्छ। पहिले मिल्न सक्ने ठाउँमा मिल्नुपर्छ। अन्तिममा पार्टी एकता नै हुनुपर्छ,’ उनले भने।

Originally published on abcnews.com.np.