धनुषा । नापजाँच भएको करिब एक दशकपछि धनुषाको सबैला नगरपालिका–११ का ५७ परिवारले जग्गाधनी पुर्जा प्राप्त गरेका छन्।

नापी कार्यालय धनुषाले साविक मखनाहा गाविस वडा नं. ६, ७, ८ र ९ अन्तर्गत पर्ने गाउँ ब्लक अर्थात् स्ववासी जग्गाको नापजाँच आर्थिक वर्ष २०७२/७३ मै सम्पन्न गरेको थियो। तर जग्गा दर्ताका लागि आवश्यक जनसहभागिता न्यून हुँदा पुर्जा वितरण प्रक्रिया लामो समयदेखि रोकिएको थियो।

आवश्यक प्रक्रिया पूरा गरेपछि नापी कार्यालयले ५७ परिवारलाई जग्गाधनी पुर्जा वितरण गरेको हो।

पुर्जा प्राप्त गरेसँगै लामो समयदेखि स्ववासीका रूपमा जग्गा भोगचलन गर्दै आएका ती परिवारले आफ्नो जग्गाको कानुनी स्वामित्व प्राप्त गरेका छन्। यससँगै जग्गाको स्वामित्व प्रमाणित गर्न नसक्दा उनीहरूले भोग्दै आएका समस्या समाधान हुने अपेक्षा गरिएको छ।

Originally published on abcnews.com.np.