काठमाडौँ । नेपाली कांग्रेसले १५औँ महाधिवेशनका लागि सभापति गगनकुमार थापाको अध्यक्षतामा मूल व्यवस्थापन समिति गठन गरेको छ। मंगलबार पत्रकार सम्मेलनमार्फत कांग्रेस प्रवक्ता देवराज चालिसेले समितिका अन्य सदस्यहरू पछि थपिने जानकारी दिए।

निर्वाचन समितिले सार्वजनिक गरेको कार्यतालिकाअनुसार मंगलबार वडा तहको अधिवेशन हुनुपर्ने थियो। तर, पार्टीभित्र असन्तुष्ट पक्षसँग छलफल गर्नुपर्ने भएकाले तल्लो तहका अधिवेशन केही दिन पछि सारिएको चालिसेले बताए।

यसैबीच कांग्रेसले जिल्लामा निर्वाचनका लागि खटिएका निर्वाचन अधिकृतहरूलाई मंगलबार प्रशिक्षण दिएको छ। प्रशिक्षण कार्यक्रममा सभापति थापाले केन्द्रीय महाधिवेशनको मिति यथावत् राखेर अन्य तहको निर्वाचन कार्यतालिका समायोजन गर्न निर्वाचन समितिलाई आग्रह गरेका थिए।

पाँच पदाधिकारीले पाँच प्रस्ताव पेस गर्ने

कांग्रेसको १५औँ महाधिवेशनमा पाँच पदाधिकारीले पाँचवटा प्रस्ताव पेस गर्ने भएका छन्।

सभापति गगनकुमार थापाले ‘आगामी दशक, लोकतन्त्र र कांग्रेस’ विषयमा मुख्य राजनीतिक प्रस्ताव पेस गर्नेछन्।

त्यस्तै, उपसभापति विश्वप्रकाश शर्माले ‘राजनीतिक संस्कृतिमा क्षयको प्रवृत्ति र युगानुकूल रूपान्तरण’ सम्बन्धी प्रस्ताव प्रस्तुत गर्नेछन्।

उपसभापति पुष्पा भुसालले ‘प्रदेश निर्वाचन विशेष प्रस्ताव’, महामन्त्री गुरुराज घिमिरेले साङ्गठनिक प्रस्ताव र महामन्त्री प्रदीप पौडेलले विधान संशोधन प्रस्ताव पेस गर्नेछन्।

कांग्रेसको केन्द्रीय महाधिवेशन असोज १६ गतेदेखि काठमाडौंमा सुरु हुनेछ। तल्लो तहका अधिवेशनको नयाँ कार्यतालिका भने निर्वाचन समितिले तय गर्ने प्रवक्ता चालिसेले बताए।

प्रचारप्रसारको जिम्मेवारी चालिसेलाई

महाधिवेशनको प्रचारप्रसारको जिम्मेवारी कांग्रेस प्रवक्ता देवराज चालिसेलाई दिइएको छ।

गत साउन २४ देखि भदौ १ गतेसम्म बसेको केन्द्रीय कार्यसमिति बैठकले महाधिवेशनमा पाँचवटा प्रस्ताव पेस गर्ने निर्णय गर्दै प्रस्ताव लेखनको जिम्मेवारीसमेत बाँडफाँट गरेको थियो।

Originally published on abcnews.com.np.