मंगलबार ललितपुरको पुल्चोकस्थित राष्ट्रिय मानवअधिकार आयोगको कार्यालयअगाडि धर्नामा रहेका वित्तीय पीडितलाई भेट्दै भण्डारीले आन्दोलनरत महिलाको स्वास्थ्य अवस्थाप्रति चासो व्यक्त गरेकी हुन्।

पीडितका माग र समस्याबारे जानकारी लिएपछि उनले सरकारले यस विषयमा गम्भीरतापूर्वक समाधानका उपाय खोज्नुपर्ने बताइन्। विगतको अन्तरिम सरकारले पीडितसँग गरेका सम्झौतालाई आधार बनाएर वर्तमान सरकारले दीर्घकालीन समाधान खोज्नुपर्ने उनको सुझाव छ।

‘धेरै आमा, दिदीबहिनी र नानीहरू केही दिनदेखि आन्दोलनमा हुनुहुन्छ भन्ने जानकारी पाएपछि उहाँहरूको स्वास्थ्य अवस्था बुझ्न र सम्बन्धित पक्षको ध्यानाकर्षण गराउन म यहाँ आएकी हुँ,’ भण्डारीले भनिन्, ‘यस समस्यालाई जरैदेखि समाधान गरेर दिदीबहिनीहरूको स्वास्थ्यमा प्रतिकूलता नआओस् र उहाँहरूले फेरि दुःख भोग्न नपरोस् भन्ने मेरो चाहना छ।’

भण्डारीले सामाजिक न्यायका लागि पीडितहरूले गरिरहेको आन्दोलनप्रति ऐक्यबद्धता समेत जनाइन्। भेटका क्रममा आन्दोलनरत पीडितहरूले आफूहरूले भोग्दै आएका समस्या र पीडा पूर्वराष्ट्रपति भण्डारीसमक्ष सुनाएका थिए।

१९ दिन पैदल हिँडेर काठमाडौं आए पीडित

पीडितका तर्फबाट बोल्दै एक सहभागीले आफूहरू चार दिनदेखि धर्नामा रहेको जानकारी गराए। उनका अनुसार केही पीडित सुनसरीको इनरुवाबाट १९ दिनसम्म पैदल यात्रा गरेर काठमाडौं आएका छन्।

पीडितहरूले धर्नास्थलमा तत्काल घुम्ती शौचालय तथा सुरक्षित बासस्थानको व्यवस्था गरिदिन पूर्वराष्ट्रपति भण्डारीसँग आग्रह गरेका थिए।

लघुवित्त तथा मिटरब्याजका कारण समस्यामा परेको भन्दै पीडितहरूले लामो समयदेखि न्याय र राहतको माग गर्दै काठमाडौं केन्द्रित आन्दोलन गर्दै आएका छन्। सहकारी पीडितसमेत आन्दोलनमा जोडिँदै आफ्ना माग सम्बोधनका लागि सरकारमाथि दबाब दिइरहेका छन्।