काठमाडौं । लघुवित्त पीडितको पक्षमा आन्दोलन गर्ने क्रममा माइतीघर मण्डलाबाट पक्राउ परेका तीन जेनजी अभियन्ता २२ दिनपछि रिहा भएका छन्। काठमाडौं जिल्ला अदालतको आदेशअनुसार धरौटी बुझाएपछि उनीहरू कारागारमुक्त भएका हुन्।

रिहा हुनेमा अजय सोडारी, प्रकाश बम र सुनिल विक रहेका छन्। उनीहरूमाथि सार्वजनिक शान्तिविरुद्धको कसुरमा अभियोग लगाइएको थियो।

लघुवित्त पीडितको पक्षमा प्रदर्शन गरिरहेका बेला पक्राउ परेका उनीहरूलाई साउन २० गते जिल्ला प्रशासन कार्यालय काठमाडौंमा पेस गरिएको थियो। प्रशासनले जनही एक लाख रुपैयाँ धरौटी माग गरेको थियो। तोकिएको धरौटी रकम बुझाउन नसकेपछि उनीहरूलाई कारागार पठाइएको थियो।

त्यसपछि अभियन्ताहरूले आफूहरूलाई गैरकानुनी रूपमा थुनामा राखिएको दाबी गर्दै सर्वोच्च अदालतमा बन्दीप्रत्यक्षीकरणको रिट निवेदन दिएका थिए। साउन २५ गते सर्वोच्च अदालतले उचित धरौटी लिएर रिहा गर्न आदेश दिएको थियो।

सर्वोच्चको आदेशपछि काठमाडौं जिल्ला प्रशासन कार्यालयले उनीहरूसँग जनही ५० हजार रुपैयाँ धरौटी माग गरेको थियो। तर उक्त रकमसमेत बुझाउन नसकेपछि उनीहरू तत्काल रिहा हुन सकेनन् र थुनामै रहनुपरेको थियो।

त्यसपछि अभियन्ताहरूले काठमाडौं जिल्ला अदालतमा पुनरावेदन गरेका थिए। जिल्ला अदालतले धरौटी रकम घटाउँदै जनही पाँच हजार रुपैयाँबुझाएर रिहा गर्न आदेश दिएपछि उनीहरूले रकम बुझाएका हुन्।

धरौटी बुझाएसँगै तीनै जना २२ दिनपछि कारागारबाट मुक्त भएका छन्।

‘आन्दोलन गरेकै आधारमा प्रतिशोध’

रिहापछि अभियन्ता अजय सोडारीले आफूहरूलाई आन्दोलन गरेकै आधारमा सरकारले प्रतिशोध साँधेर थुनामा राखेको आरोप लगाए।

उनले लघुवित्त पीडितको पक्षमा आवाज उठाउँदा आफूहरूलाई सार्वजनिक शान्तिविरुद्धको अभियोग लगाएर पक्राउ गरिएको भन्दै राज्यले आन्दोलनकारीको आवाज दबाउन खोजेको दाबी गरे।

सोडारीका अनुसार आफूहरूको आन्दोलन कुनै व्यक्तिगत स्वार्थका लागि नभई लघुवित्तका कारण समस्यामा परेका पीडितहरूको माग सम्बोधन गराउन केन्द्रित थियो।

अभियन्ताहरू रिहा भएपछि लघुवित्त पीडितको आन्दोलन तथा उनीहरूमाथि लगाइएको अभियोगको विषयमा थप राजनीतिक तथा कानुनी बहससमेत हुने देखिएको छ।

Originally published on abcnews.com.np.