काठमाडौँ । सर्वोच्च अदालतले क्याथे प्यासिफिक एयरवेजमा कार्यरत निरज शाखकर्मीलाई प्रहरीको चारित्रिक प्रमाणपत्र उपलब्ध गराउन आदेश दिएको छ। न्यायाधीश बालकृष्ण ढकालको इजलासले मंगलबार शाखकर्मीको निवेदनमाथि सुनुवाइ गर्दै प्रहरीलाई चारित्रिक प्रमाणपत्र दिन निर्देशनसहित अन्तरिम आदेश जारी गरेको हो।

शाखकर्मी विगत सात वर्षदेखि क्याथे प्यासिफिक एयरवेजमा कार्यरत छन्। उनीविरुद्ध जबरजस्ती करणीको आरोपमा मुद्दा दायर भएको थियो। जिल्ला अदालतले उनलाई सफाइ दिए पनि उच्च अदालतले दोषी ठहर गरेको थियो। उच्च अदालतको फैसलाविरुद्ध उनी सर्वोच्च अदालत पुगेका छन् र उक्त मुद्दा विचाराधीन छ।

यसैबीच प्रहरीले चारित्रिक प्रमाणपत्र उपलब्ध नगराउँदा आफ्नो रोजगारी नै गुम्ने अवस्था आएको भन्दै शाखकर्मीले सर्वोच्चमा निवेदन दिएका थिए।

शाखकर्मीले त्रिभुवन अन्तर्राष्ट्रिय विमानस्थलको टर्मिनल क्षेत्रमा यात्रु सेवाका लागि नियमित आवतजावत गर्नुपर्ने हुन्छ। तर, प्रहरीले चारित्रिक प्रमाणपत्र नदिएपछि नेपाल नागरिक उड्डयन कार्यालयले उनलाई विमानस्थल प्रवेश पास उपलब्ध गराउन सकेको थिएन।

रोजगारीको हकमा असर पर्ने भन्दै अन्तरिम आदेश

निवेदकलाई चारित्रिक प्रमाणपत्र उपलब्ध नगराउँदा विमानस्थल प्रवेश पास रोकिएको र त्यसबाट उनको पेशा तथा रोजगारी गर्ने संवैधानिक हकमा प्रतिकूल असर पर्न सक्ने सर्वोच्च अदालतले जनाएको छ।

मुद्दा सर्वोच्चमा विचाराधीन रहेकै अवस्थामा चारित्रिक प्रमाणपत्र नपाउँदा रोजगारीबाट वञ्चित हुनुपर्ने अवस्था सिर्जना भएको भन्दै अदालतले तत्कालका लागि प्रहरी रिपोर्ट उपलब्ध गराउन आदेश दिएको हो।

अदालतको आदेशसँगै शाखकर्मीलाई विमानस्थलमा आफ्नो कामका लागि आवश्यक प्रवेश पास प्राप्त गर्ने बाटो खुलेको छ। सर्वोच्चको यो आदेशले विचाराधीन फौजदारी मुद्दाका कारण तत्काल रोजगारीबाट वञ्चित हुन सक्ने अवस्थालाई समेत सम्बोधन गरेको छ।

Originally published on abcnews.com.np.