विराटनगर । कोशी प्रदेश सरकारमा मन्त्रीहरूको जिम्मेवारी हेरफेरपछि नेकपा एमालेभित्रको असन्तुष्टि कायमै देखिएको छ। मुख्यमन्त्री हिक्मतकुमार कार्कीले मन्त्रिपरिषद् पुनर्गठन गर्दै जिम्मेवारी हेरफेर गरेपछि केही मन्त्रीले असन्तुष्टि जनाएका हुन्।

आन्तरिक मामिला तथा कानुनमन्त्री रहेका इन्द्रमणि पराजुलीलाई स्वास्थ्य मन्त्रालयको जिम्मेवारी दिइए पनि उनी मंगलबार पदभार ग्रहण गर्न मन्त्रालय गएनन्। मुख्यमन्त्रीले आफूलाई जानकारी नदिई मन्त्रालय परिवर्तन गरेको भन्दै पराजुली असन्तुष्ट बनेका हुन्।

मन्त्रालय हेरफेरपछि अन्य नवनियुक्त मन्त्रीहरूले सोमबार नै पदभार ग्रहण गरेर काम सुरु गरे पनि पराजुली मंगलबार साँझसम्म स्वास्थ्य मन्त्रालय पुगेनन्। पराजुली मन्त्रालय नपुगेपछि स्वास्थ्य राज्यमन्त्रीको जिम्मेवारी पाएका उमाकान्त गौतम पनि मन्त्रालय नगएको बताइएको छ।

पराजुलीले मन्त्रालय हेरफेर गर्नुअघि मुख्यमन्त्रीले आफूसँग कुनै परामर्श नगरेको बताएका छन्। सोमबार पदवहालीका क्रममा उनले आफूले कुन मन्त्रालयको जिम्मेवारी पाउने भन्ने विषयमा अन्तिम समयसम्म जानकारी नभएको बताएका थिए।

ओलीसँग असन्तुष्टि पोखे

मन्त्रालयको जिम्मेवारीप्रति असन्तुष्ट बनेका पराजुलीले मंगलबार राति एमाले अध्यक्ष केपी शर्मा ओलीलाई फोन गरेर आफू अन्यायमा परेको गुनासो गरेको स्रोतको दाबी छ।

पराजुलीले आफूले चाहेको मन्त्रालय नपाएको भन्दै स्वास्थ्य मन्त्रालयमा हाजिर नहुनेबारे समेत ओलीलाई जानकारी गराएको बताइएको छ। ओलीले जुनसुकै मन्त्रालयको जिम्मेवारी भए पनि मन्त्रीका रूपमा काम गर्न सुझाव दिएपछि पराजुली केही नरम भएको स्रोतको भनाइ छ।

पराजुलीले स्वास्थ्य राज्यमन्त्री उमाकान्त गौतमलाई स्वास्थ्यमन्त्री बनाउनसमेत ओलीसमक्ष आग्रह गरेको बताइएको छ। तर, ओलीले यस विषयमा सकारात्मक प्रतिक्रिया नदिएको स्रोतले जनाएको छ।

पराजुली पूर्वमुख्यमन्त्री शेरधन राईनिकट नेता हुन्। यसअघि मुख्यमन्त्री कार्कीलाई हटाउने प्रयासमा उनी सक्रिय रहेको बताइँदै आएको छ।

शेरधन समूहको असन्तुष्टि कायमै

मन्त्रिपरिषद् हेरफेरपछि पनि एमालेभित्रको शेरधन राई समूह मुख्यमन्त्री कार्कीप्रति असन्तुष्ट रहेको नेताहरू बताउँछन्। सरकारलाई कमजोर बनाउने रणनीतिमा समूह सक्रिय रहेको उनीहरूको दाबी छ।

यसैबीच खानेपानी, सिँचाइ तथा ऊर्जा मन्त्री तिलचन पाठकले पनि आफ्नो मर्यादाक्रम नयाँ मन्त्रीभन्दा तल राखिएको भन्दै असन्तुष्टि जनाएका थिए। शपथपछि मन्त्रालयबाट बाहिरिँदै गर्दा उनले असन्तुष्टि व्यक्त गरेका थिए।

मुख्यमन्त्री कार्कीका विश्वासपात्र प्रदेशसभा सदस्य रेवतीरमण भण्डारीले भने मन्त्रालय विभाजन र जिम्मेवारी हेरफेरबारे पार्टी अध्यक्ष ओलीलाई जानकारी गराएरै निर्णय गरिएको बताएका छन्।

‘व्यक्ति–व्यक्तिलाई जानकारी दिँदै हिँड्ने कुरा थिएन,’ भण्डारीले भने, ‘मुख्यमन्त्रीज्यूले जिम्मेवारी तोक्नुभएको विषयमा कसैलाई मन्त्रालय मन नपरे राजीनामा दिन पाइन्छ।’

कसलाई कुन जिम्मेवारी?

मुख्यमन्त्री हिक्मतकुमार कार्कीले सोमबार इन्द्रमणि पराजुलीलाई स्वास्थ्य, विदुरकुमार लिङ्थेपलाई आर्थिक मामिला तथा योजना, रामप्रसाद महतोलाई उद्योग, कृषि तथा सहकारी, तिलचन पाठकलाई खानेपानी, सिँचाइ तथा ऊर्जा, खिनु लिम्बुलाई पर्यटन, वन तथा वातावरण र जीवन आचार्यलाई भौतिक पूर्वाधार विकास मन्त्रालयको जिम्मेवारी दिएका छन्।

त्यस्तै, गम्बु शेर्पालाई आन्तरिक मामिला तथा कानुन, गीता तिम्सिनालाई सामाजिक विकास, सपना परियारलाई भौतिक पूर्वाधार विकास राज्यमन्त्री र उमाकान्त गौतमलाई स्वास्थ्य राज्यमन्त्रीको जिम्मेवारी दिइएको छ।

नेकपा एमाले नेतृत्वको कोशी प्रदेश सरकारमा नेकपा सहभागी भएपछि सोमबार मन्त्रिपरिषद् हेरफेर गरिएको हो।

Originally published on abcnews.com.np.