टोखा–छहरे सडकमा राति सवारी आवागमन बन्द

नुवाकोट । वर्षाका कारण सडकमा पहिरो, लेदो तथा गेग्रान खस्ने जोखिम बढेपछि नुवाकोट जिल्ला प्रशासनले टोखा–छहरे सडकखण्डमा रातिको समयमा सवारी आवागमन बन्द गरेको छ ।

नुवाकोटका प्रमुख जिल्ला अधिकारी शम्भुप्रसाद रेग्मीका अनुसार नुवाकोट हुँदै धादिङ र चीनसँगको नाका रसुवागढीसम्म जोडिने मुख्य सडकमा पहिरोको जोखिम बढेकाले दैनिक राति १० बजेदेखि बिहान ५ बजेसम्म यातायात सञ्चालनमा रोक लगाइएको हो ।

शिवपुरी गाउँपालिका–८ स्थित घट्टेखोलामा वर्षाका कारण लेदो, पहिरो तथा गेग्रान खस्ने जोखिम बढेपछि यात्रुको सुरक्षालाई ध्यानमा राख्दै अत्यावश्यकबाहेकका सवारीसाधन सञ्चालनमा रोक लगाइएको प्रशासनले जनाएको छ ।

भदौ १ गते रातिदेखि लागू गरिएको उक्त व्यवस्था अर्को सूचना जारी नभएसम्म कायम रहनेछ ।

प्रमुख जिल्ला अधिकारी रेग्मीका अनुसार जोखिमयुक्त क्षेत्रमा सुरक्षाकर्मी परिचालन गरिएको छ । एम्बुलेन्सलगायत आकस्मिक सेवाका सवारीसाधनलाई भने सञ्चालन गर्न दिइनेछ । उनले वर्षाको समयमा अत्यावश्यक कामबाहेक घरबाहिर ननिस्कन तथा रातिको समयमा यात्रा नगर्न सर्वसाधारण, यातायात व्यवसायी र सम्बन्धित सबैलाई आग्रह गरेका छन् ।

जिल्ला प्रहरी कार्यालय नुवाकोटले सडक तथा मौसमको अवस्था जोखिमपूर्ण रहेकाले सावधानी अपनाउन तथा प्रशासनको निर्णय कार्यान्वयनमा सहयोग गर्न आग्रह गरेको छ ।

विपद्सम्बन्धी जानकारी तथा सहयोगका लागि जिल्ला प्रहरी कार्यालयको १००, सशस्त्र प्रहरी बलको १११४ तथा जिल्ला आपतकालीन कार्यसञ्चालन केन्द्रको १२३४ मा सम्पर्क गर्न सकिने जनाइएको छ ।

Originally published on abcnews.com.np.