काठमाडौं । नेपाली कांग्रेसले केन्द्रीय समिति बैठकबाट भएका १६ वटा निर्णय सार्वजनिक गरेको छ। पार्टी केन्द्रीय कार्यालय सानेपामा आयोजित पत्रकार सम्मेलनमा प्रवक्ता देवराज चालिसेले बैठकका निर्णय सार्वजनिक गरेका हुन्।

साउन २४ देखि भदौ १ गतेसम्म पार्टी सभापति गगन थापाको अध्यक्षतामा बसेको बैठकले मुलुकको समसामयिक राजनीतिक अवस्था, आर्थिक तथा सामाजिक क्षेत्र, जनजीविकाका समस्या, सरकारको कार्यसम्पादन र पार्टीको संगठनात्मक सुदृढीकरणलगायत विषयमा निर्णय गरेको हो।

प्रवक्ता चालिसेका अनुसार बैठकले वर्तमान राजनीतिक अवस्थाप्रति चिन्ता व्यक्त गर्दै सरकारको कमजोर कार्यशैली र शासकीय अराजकताप्रति ध्यानाकर्षण गराएको छ। साथै पार्टी र भ्रातृ संस्थाको संगठनात्मक सुदृढीकरणका लागि आवश्यक निर्देशनसमेत दिएको छ।

कांग्रेसका १६ निर्णय

बैठकले आर्थिक अवस्था सुधारका लागि सरकारलाई आवश्यक कदम चाल्न आग्रह गरेको छ। सामाजिक सुरक्षा कार्यक्रमलाई प्रभावकारी बनाउन तथा भ्रष्टाचार नियन्त्रणका लागि कठोर कदम चाल्न पनि सरकारसँग माग गरिएको छ।

त्यस्तै, पार्टी विधान संशोधनको प्रक्रिया अघि बढाउने, भ्रातृ संस्थाहरूको पुनर्गठन गर्ने तथा आगामी स्थानीय र राष्ट्रिय निर्वाचनको तयारी थाल्ने निर्णय बैठकले गरेको छ।

कांग्रेसले जनआन्दोलनको भावनालाई संस्थागत गर्नुपर्ने, समावेशी प्रतिनिधित्व सुनिश्चित गर्नुपर्ने र सुशासन प्रवर्द्धनमा जोड दिनुपर्ने निष्कर्ष निकालेको छ।

बैठकले पार्टीको नीति तथा कार्यक्रमलाई प्रभावकारी रूपमा अघि बढाउने, किसानका उत्पादनको उचित मूल्य सुनिश्चित गर्ने तथा श्रमिकको हक–अधिकार संरक्षण गर्ने विषयमा समेत निर्णय गरेको छ।

शिक्षा क्षेत्रमा सुधार, स्वास्थ्य सेवा सर्वसुलभ र पहुँचयोग्य बनाउने, पर्यटन प्रवर्द्धन गर्ने तथा वातावरण संरक्षणमा विशेष ध्यान दिने निर्णयसमेत बैठकले गरेको प्रवक्ता चालिसेले जानकारी दिए।

कांग्रेसले यी निर्णय पार्टीको संगठनात्मक हितसँगै मुलुकको समग्र हितलाई ध्यानमा राखेर गरिएको जनाएको छ।

Originally published on abcnews.com.np.