हेटौँडा, मकवानपुर । हेटौँडा–१९ बस्तीपुरस्थित बासुदेव खोलाले बगाएर बेपत्ता भएका दुई बालिकामध्ये थप एक जनाको शव बुधबार फेला परेको छ।

मंगलबार अपराह्न विद्यालयबाट घर फर्किने क्रममा चार बालिकालाई खोलाले बगाएको थियो। घटनामा एक बालिकाको सकुशल उद्धार गरिएको थियो भने एक जनाको शव मंगलबार नै फेला परेको थियो। दुई जना बेपत्ता थिए।

बेपत्ता बालिकाको खोजीका क्रममा बुधबार बिहान बिनिता भ्लोनको शव खोलामा फेला परेको जिल्ला प्रहरी कार्यालय मकवानपुरका प्रवक्ता माधवप्रसाद काफ्लेले जानकारी दिए।

घटनामा कक्षा ५ मा अध्ययनरत सुमित्रा भ्लोन अझै बेपत्ता छन्। उनको खोजी जारी रहेको प्रहरीले जनाएको छ।

खोलाले बगाएका चार बालिकामध्ये राक्सिराङ–१ की कक्षा २ मा अध्ययनरत रेश्मा स्याङ्तानको शव मंगलबार नै फेला परेको थियो। कक्षा ६ मा अध्ययनरत सीमा भ्लोनलाई घाइते अवस्थामा उद्धार गरी हेटौँडा अस्पतालमा उपचार भइरहेको छ।

बेपत्ता सुमित्राको खोजीमा नेपाल प्रहरी, नेपाली सेना, सशस्त्र प्रहरी तथा स्थानीयवासी परिचालन भएका छन्।

Originally published on abcnews.com.np.