काठमाडौँ । नेपाल दूरसञ्चार प्राधिकरणले एकीकृत दूरसञ्चार नीतिको मस्यौदामा राय तथा सुझाव माग गरेको छ । प्राधिकरणले बुधबार सूचना जारी गर्दै सरोकारवालालाई १५ दिनभित्र सुझाव तथा प्रतिक्रिया उपलब्ध गराउन आग्रह गरेको हो ।

प्राधिकरणका अनुसार दूरसञ्चारसम्बन्धी विद्यमान कानुनलाई समयानुकूल परिमार्जन गर्दै कार्यान्वयन संयन्त्रलाई प्रभावकारी बनाउने उद्देश्यले एकीकृत दूरसञ्चार नीतिको मस्यौदा तयार गरिएको हो ।

नीतिमार्फत दूरसञ्चार सेवालाई गुणस्तरीय, सुरक्षित, भरपर्दो तथा सर्वसुलभ बनाउने लक्ष्य राखिएको प्राधिकरणले जनाएको छ । साथै विभिन्न क्षेत्रमा सूचना तथा सञ्चार प्रविधिको अधिकतम प्रयोग गर्दै डिजिटल रूपान्तरणमार्फत मुलुकको आर्थिक तथा सामाजिक विकासमा योगदान पुर्‍याउने उद्देश्यसमेत नीतिले समेटेको छ ।

प्राधिकरणले नयाँ नीतिले दूरसञ्चार क्षेत्रमा हाल देखिएका समस्या समाधान गर्नुका साथै भविष्यमा आउन सक्ने चुनौती सामना गर्न सहयोग पुग्ने अपेक्षा गरेको छ ।

विद्यमान कानुनका कमीकमजोरी हटाउँदै दूरसञ्चार सेवा प्रदायक कम्पनीलाई थप प्रोत्साहन गर्ने उद्देश्य पनि नीतिको मस्यौदामा समेटिएको प्राधिकरणले जनाएको छ ।

प्राधिकरणले मस्यौदामाथि सरोकारवाला तथा सम्बन्धित पक्षबाट प्राप्त सुझावलाई अध्ययन गरी आवश्यकताअनुसार समेटिने जनाएको छ ।

Originally published on abcnews.com.np.