सल्यान । सवारी दुर्घटनामा गम्भीर घाइते राष्ट्रिय स्वतन्त्र पार्टी (रास्वपा) कपुरकोटका सभापति बेदबहादुर वलीको उपचारका क्रममा मृत्यु भएको छ।

कपुरकोट गाउँपालिका–३ मूलपानीमा मंगलबार बिहान फोर्स गाडी र मोटरसाइकल आपसमा ठोक्किँदा गम्भीर घाइते भएका वलीको घोराहीस्थित सञ्जीवनी टिचिङ हस्पिटलमा उपचारका क्रममा बुधबार बिहान ७ः५५ बजे मृत्यु भएको जिल्ला प्रहरी कार्यालय सल्यानले जनाएको छ।

रास्वपा कपुरकोटका सचिव चुडामणि पिएमले पनि वलीको मृत्यु भएको पुष्टि गरेका छन्। उनको शव पोस्टमार्टमका लागि राप्ती प्रादेशिक अस्पताल तुलसीपुर ल्याउने तयारी भइरहेको प्रहरीले जनाएको छ।

मंगलबार बिहान करिब ११ बजे मूलपानीमा लु.प्र. ०१–००१ ख १११२ नम्बरको फोर्स गाडी र वलीले चलाएको बा.६८ प २५२८ नम्बरको मोटरसाइकल ठोक्किएका थिए। दुर्घटनामा वलीसँगै कपुरकोट–६ निवासी ५२ वर्षीय शुकलाल वली पनि घाइते भएका थिए। शुकलालको उपचार भइरहेको प्रहरीले जनाएको छ।

दुर्घटनापछि प्रहरीले फोर्स गाडी र त्यसका चालक दाङको तुलसीपुर–११ निवासी २७ वर्षीय सुरज मिजारलाई नियन्त्रणमा लिएको छ। उनलाई इलाका प्रहरी कार्यालय लुहाममा राखेर घटनाबारे थप अनुसन्धान भइरहेको प्रहरीले जनाएको छ।

Originally published on abcnews.com.np.