सुर्खेत । कर्णाली प्रदेशका मुख्यमन्त्री मंगलबहादुर शाहीले आज विश्वासको मत लिने भएका छन् ।
कर्णाली प्रदेशसभाको आज दिउँसो ३ बजे बस्ने बैठकमा उनले विश्वासको मत लिने कार्यसूची रहेको प्रदेशसभा सचिवालयका सूचना अधिकारी राजेन्द्र पौडेलले जानकारी दिए ।
मुख्यमन्त्री शाहीले विश्वासको मत लिने प्रयोजनका लागि सोमबार प्रदेशसभामा पत्र दर्ता गराइसकेका छन् । नेकपा (एमाले)को समर्थनमा शाही साउन १२ गते कर्णाली प्रदेशको मुख्यमन्त्रीमा नियुक्त भएका थिए ।
सत्तासाझेदार दुई दलबीच मन्त्रालय बाँडफाँटमा सहमति जुट्न ढिलो भएपछि मन्त्रिपरिषद् विस्तार हुन सकेको छैन । मुख्यमन्त्री शाहीले प्रदेशसभाबाट विश्वासको मत लिएपछि मात्रै मन्त्रिपरिषद् विस्तार गर्ने तयारी गरेका छन् ।
४० सदस्यीय कर्णाली प्रदेशसभामा नेपाली कम्युनिस्ट पार्टी (नेकपा)का १४ र नेकपा (एमाले)का १० प्रदेशसभा सदस्य छन् । यी दुई दलको समर्थनमा मुख्यमन्त्री शाहीले सरकारको नेतृत्व गरिरहेका छन् ।
Originally published on abcnews.com.np.
प्रतिक्रिया दिनुहोस्