काठमाडौं । नेपाली कांग्रेसको १५औँ केन्द्रीय महाधिवेशन पूर्वनिर्धारित मितिमै हुने भएको छ। तर, वर्षात्का कारण तल्लो तहका अधिवेशन प्रभावित हुन सक्ने भन्दै केन्द्रीय निर्वाचन समितिले विभिन्न तहको निर्वाचन कार्यतालिका परिमार्जन गरेको छ।

केन्द्रीय निर्वाचन समितिका संयोजक प्रेमबहादुर खड्काले जारी गरेको विज्ञप्तिअनुसार केन्द्रीय महाधिवेशन असोज १६ देखि १९ गतेसम्म काठमाडौंमा यथावत् हुनेछ। त्यसअघि सम्पन्न गर्नुपर्ने वडा, गाउँ/नगर, प्रदेश सभा क्षेत्र, प्रतिनिधिसभा क्षेत्र, जिल्ला र प्रदेश अधिवेशनको मिति भने पुनः निर्धारण गरिएको छ।

निर्वाचन समितिले प्रतिकूल मौसमका कारण अधिवेशनमा पर्न सक्ने असर कम गर्न तथा पार्टीभित्र व्यापक सहभागिता, संवाद र सहमतिको वातावरण बनाउन कार्यतालिका संशोधन गरिएको जनाएको छ।

भदौ २४ देखि वडा अधिवेशन

संशोधित कार्यतालिकाअनुसार भदौ २४ गते देशभरका ६ हजार ७ सय ४३ वडामा अधिवेशन हुनेछ। वडा अधिवेशनबाटै क्षेत्रीय प्रतिनिधिसमेत चयन गरिनेछ।

त्यसपछि भदौ २७ गते गाउँपालिका तथा नगरपालिकाको अधिवेशन हुनेछ। भदौ ३१ गते प्रदेश सभा क्षेत्रीय अधिवेशन सम्पन्न गरिनेछ भने असोज ३ गते प्रतिनिधिसभा क्षेत्रीय अधिवेशन हुनेछ।

एक मात्र प्रतिनिधिसभा निर्वाचन क्षेत्र भएका जिल्लामा सोही दिन जिल्ला अधिवेशन पनि सम्पन्न गर्ने कार्यतालिका छ। यसै दिन महाधिवेशन प्रतिनिधि चयन तथा सम्बन्धित कार्यसमितिको निर्वाचन गरिनेछ।

असोज ७ मा जिल्ला, १० मा प्रदेश अधिवेशन

संशोधित तालिकाअनुसार असोज ७ गते जिल्ला अधिवेशन र असोज १० गते प्रदेश अधिवेशन सम्पन्न हुनेछ।

त्यसपछि कांग्रेसको केन्द्रीय महाधिवेशन असोज १६, १७, १८ र १९ गते काठमाडौंमा आयोजना हुनेछ। यसरी तल्लो तहदेखि प्रदेशसम्मका अधिवेशन सम्पन्न गर्दै केन्द्रीय नेतृत्व चयनको प्रक्रियालाई अघि बढाउने तयारी कांग्रेसको छ।

निर्वाचन प्रतिनिधिलाई तालिम

निर्वाचन समितिले महाधिवेशन प्रक्रिया व्यवस्थित बनाउन निर्वाचन प्रतिनिधि तथा अधिकृतलाई अभिमुखीकरण दिने कार्यक्रमसमेत तय गरेको छ।

भदौ २ देखि १० गतेसम्म निर्वाचन प्रतिनिधिलाई अभिमुखीकरण तालिम दिइनेछ। भदौ ११ गते निर्वाचन अधिकृतलाई जिल्लामा खटाइनेछ भने भदौ १५ गते वडामा निर्वाचन प्रतिनिधि पठाइनेछ।

त्यसैगरी, भदौ १६ देखि २० गतेसम्म वडा तहमा अभिमुखीकरण तालिम सञ्चालन गरिनेछ। बाँकी रहेका नेपाली जनसम्पर्क समितिका अधिवेशन पनि भदौ मसान्तभित्र सम्पन्न गरिसक्नुपर्ने समयसीमा तोकिएको छ।

सर्वोच्चको फैसलालाई आधार

कांग्रेस केन्द्रीय कार्यसमितिको साउन २४ देखि भदौ १ गतेसम्म बसेको बैठकले संविधान, प्रचलित कानुन, पार्टी विधान तथा सर्वोच्च अदालतको वैशाख ४ गतेको फैसलालाई आधार बनाएर महाधिवेशन प्रक्रिया अघि बढाउने निर्णय गरेको थियो।

सोही निर्णयका आधारमा केन्द्रीय निर्वाचन समितिले संशोधित निर्वाचन क्यालेन्डर सार्वजनिक गरेको हो।

नेतृत्व चयनको बाटो खुला

महाधिवेशनको मूल मिति नबदलिएकाले कांग्रेसभित्र अब नेतृत्व चयनको तयारी थप तीव्र हुने भएको छ। तल्लो तहका अधिवेशनसँगै क्षेत्रीय प्रतिनिधि र महाधिवेशन प्रतिनिधि चयन हुने भएकाले आगामी नेतृत्वको समीकरण पनि यही चरणबाट आकार लिनेछ।

यसर्थ, कार्यतालिका संशोधनलाई केवल प्राविधिक तयारीका रूपमा मात्र नभई कांग्रेसभित्र आगामी नेतृत्वका लागि शक्ति–सन्तुलन निर्माण हुने महत्त्वपूर्ण चरणका रूपमा समेत हेरिएको छ।

Originally published on abcnews.com.np.