नयाँदिल्ली । भारतको नयाँ दिल्लीमा आयोजना हुने ‘फुटवेयर इन्डिया एक्स्पो–२०२६’ मा नेपाली जुत्ता ब्रान्ड जेम्सले सहभागिता जनाउने भएको छ।

अगस्ट २१ देखि २३ तारिखसम्म नयाँ दिल्लीस्थित प्रगति मैदानमा आयोजना हुने एक्स्पोमा नेपाल जुत्ता फ्याक्ट्री प्रालिले आफ्नो स्टल राख्ने भएको हो।

कम्पनीका प्रमुख कार्यकारी अधिकृत (सीईओ) विकास अर्यालका अनुसार लामो समयपछि नेपाली कम्पनीले उक्त अन्तर्राष्ट्रिय प्रदर्शनीमा सहभागिता जनाउन लागेको हो। नेपाल जुत्ता फ्याक्ट्रीले विगत २५ वर्षदेखि विभिन्न प्रकारका जुत्ता उत्पादन गर्दै आएको छ।

एक्स्पोमा भारतका करिब ४ सय जुत्ता उद्योग तथा व्यवसाय सहभागी हुने अनुमान गरिएको छ।

सीईओ अर्यालले अन्तर्राष्ट्रियस्तरको प्रदर्शनीमा नेपाली कम्पनीको सहभागिताले नेपालको फुटवेयर उद्योग र उत्पादनलाई भारतीय बजारमा चिनाउन महत्वपूर्ण भूमिका खेल्ने बताए।

उनका अनुसार एक्स्पो नेपाली जुत्ताको गुणस्तर, उत्पादन क्षमता र ब्रान्डलाई अन्तर्राष्ट्रिय बजारमा प्रस्तुत गर्नुका साथै नयाँ बजार विस्तार गर्ने अवसरसमेत हुनेछ।

कम्पनीले भारतीय बजारमा नेपाली उत्पादनको पहुँच विस्तार गर्न एक्स्पोको सहभागितालाई महत्वपूर्ण अवसरका रूपमा लिएको जनाएको छ।

Originally published on abcnews.com.np.