काठमाडौं । रुसले युक्रेनको राजधानी किभ र आसपासका क्षेत्रमा गरेको पछिल्लो मिसाइल आक्रमणमा कम्तीमा पाँच जनाको मृत्यु भएको छ भने २३ जना घाइते भएका छन्। युक्रेनी अधिकारीहरूका अनुसार आक्रमणमा आवासीय भवन, गोदाम, स्वास्थ्य संस्था तथा अन्य संरचनामा क्षति पुगेको छ।

युक्रेनको स्टेट इमर्जेन्सी सर्भिसका उद्धार टोलीले भग्नावशेषमा फसेका मानिसको खोजी तथा उद्धार जारी राखेका छन्। आक्रमणका कारण विभिन्न स्थानमा आगलागीसमेत भएको थियो।

किभका मेयर भिताली क्लित्स्कोका अनुसार आक्रमणमा बाल अस्पतालमा समेत क्षति पुगेको छ। अस्पतालका झ्यालका सिसा फुटेका छन् भने आसपासका क्षेत्रमा रहेका केही सवारीसाधनमा आगलागी भएको छ।

किभ प्रशासनले आक्रमणअघि नै स्थानीय बासिन्दालाई सुरक्षित स्थानमा जान आग्रह गर्दै हवाई आक्रमणसम्बन्धी चेतावनी जारी गरेको थियो। आक्रमणपछि विभिन्न क्षेत्रमा उद्धार तथा आगो नियन्त्रणको काम जारी रहेको जनाइएको छ।

यसैबीच, रुसको आक्रमणपछि छिमेकी पोल्यान्डले आफ्नो हवाई क्षेत्रको सुरक्षाका लागि ‘सावधानीमूलक सैन्य विमान अभियान’ सुरु गरेको छ। पोल्यान्डले युक्रेनमा भएको रुसी आक्रमणका क्रममा आफ्नो हवाई क्षेत्रलाई सम्भावित जोखिमबाट सुरक्षित राख्न सैन्य विमान परिचालन गरेको जनाएको छ।

Originally published on abcnews.com.np.