काठमाडौं । श्रम संस्कृति पार्टीका निलम्बित केन्द्रीय सदस्य राजेश खिम्दुङले पार्टी अध्यक्ष हर्कराज राईले आफूलाई स्पष्टीकरणको अवसर नदिई सामाजिक सञ्जालमार्फत निलम्बन गरेको भन्दै असहमति जनाएका छन्।

बिहीबार सामाजिक सञ्जालमा लामो स्टाटस लेख्दै खिम्दुङले कुनै पनि लोकतान्त्रिक संगठनमा आरोप लाग्दैमा त्यसलाई अन्तिम सत्य मान्न नहुने बताएका छन्। आरोपको निष्पक्ष छानबिन गरी आरोपितलाई आफ्नो पक्ष राख्ने अवसर दिनुपर्ने र प्रमाणका आधारमा निर्णय हुनुपर्ने उनको भनाइ छ।

“मलाई आफ्नो पक्ष राख्ने पर्याप्त अवसर दिनुपर्छ जस्तो लागेको थियो। पर्याप्त सुनुवाइ गर्नुपर्थ्यो जस्तो लागेको थियो। तर अध्यक्षज्यूले फेसबुकमार्फत म निलम्बित भएको घोषणा गर्नुभएको छ,” उनले लेखेका छन्।

खिम्दुङले आफूलाई व्यक्तिगत अपमान वा पीडा भएको विषयभन्दा पनि पार्टीभित्र विधि, विधान, न्याय र लोकतान्त्रिक संस्कार कायम हुनुपर्ने विषय महत्वपूर्ण रहेको बताएका छन्।

‘व्यक्तिको होइन, विधिको पक्षमा उभिऔँ’

उनले आफू पद वा प्रतिष्ठाका लागि नबोलेको स्पष्ट गर्दै पार्टीका सदस्यलाई व्यक्तिको पक्ष वा विपक्षमा नभई विधिको पक्षमा उभिन आग्रह गरेका छन्।

“आज ममाथि अन्याय भयो भने भोलि यही अन्याय अरू कुनै श्रमदातामाथि पनि हुन सक्छ,” भन्दै उनले भावनाका आधारमा नभई सत्य, तथ्य र प्रमाणका आधारमा निर्णय गर्ने वातावरण बनाउन माग गरेका छन्।

खिम्दुङले कसैलाई सुनेकै भरमा दोषी नठहर्‍याउन र पार्टीलाई व्यक्ति केन्द्रित नभई विधि तथा विधान केन्द्रित बनाउन आग्रह गरेका छन्।

‘नेतृत्वलाई प्रश्न गर्नु विद्रोह होइन’

श्रम संस्कृति पार्टी पुराना राजनीतिक दलभन्दा फरक लोकतान्त्रिक चरित्र भएको पार्टी बन्नुपर्ने उल्लेख गर्दै उनले नेतृत्वप्रति प्रश्न उठाउनु विद्रोह नभएको बताएका छन्।

उनका अनुसार विधि र न्यायको माग गर्नु पार्टीविरोधी गतिविधि पनि होइन। “म आज पनि सत्यको पक्षमा छु। म आज पनि लोकतन्त्रको पक्षमा छु। म आज पनि श्रमदाताहरूको सम्मान र अधिकारको पक्षमा छु,” उनले लेखेका छन्।

उनले व्यक्ति होइन विधि जिताउन, पद होइन न्याय रोज्न र डर होइन सत्यको साथ दिन पार्टी पंक्तिलाई आग्रह गरेका छन्। साथै श्रम संस्कृति पार्टीलाई नेपालको ठूलो पार्टी बनाउन सबै मिलेर अघि बढ्नुपर्ने बताएका छन्।

Originally published on abcnews.com.np.