काठमाडौं । ३५० रुपैयाँको मोबाइल कभर र सिसा फेर्ने खर्च गरेका तुल पुडासैनीले करदाता प्रोत्साहन पुरस्कारअन्तर्गत १० लाख रुपैयाँको बम्पर उपहार जितेका छन् ।

आन्तरिक राजस्व विभागले साउन महिनाको दोस्रो बम्पर उपहारअन्तर्गत सोमबार अर्थमन्त्री डा. स्वर्णिम वाग्लेको उपस्थितिमा पुडासैनीलाई विजेता घोषणा गरेको हो ।

साउन महिनाको दोस्रो १६ दिनमा हरेक दिन एक–एक जना गरी १६ जना र सबै सहभागीमध्येबाट एक जना बम्पर विजेता गरी कुल १७ जना उपभोक्तालाई पुरस्कृत गरिएको थियो । तीमध्ये पुडासैनी बम्पर उपहारका विजेता बनेका हुन् ।

पुडासैनीले मोबाइलको कभर र सिसा फेर्न गरेको ३५० रुपैयाँको कारोबारबाटै १० लाख रुपैयाँको बम्पर उपहार पाएका हुन् ।

को हुन् पुडासैनी ?

पुडासैनी नेपाल प्रहरीका प्रहरी नायब निरीक्षक हुन् । उनी बागमती प्रदेश प्रहरी गण, हेटौँडामा कार्यरत छन् । उनको स्थायी घर बाराको सिमरा हो ।

उनका अनुसार मोबाइलको कभर र सिसा मर्मत गर्न दुई–तीनवटा पसलमा पुगेपछि गणेश इलेक्ट्रोनिक्स एन्ड मोबाइल सर्भिसमा कारोबार गरेका थिए ।

पछि सोही कारोबारबाट आफूलाई १० लाख रुपैयाँको बम्पर उपहार परेको जानकारी पाएको उनले बताए ।

‘मोबाइलको कभर र सिसा मर्मत गर्न दुई–तीनवटा पसलमा गएर गणेश इलेक्ट्रोनिक्स एन्ड मोबाइल सर्भिसमा पुगेको थिएँ । त्यहीँ गरेको कारोबारमा १० लाखको उपहार परेको थाहा पाएँ,’ पुडासैनीले भने ।

कर प्रणालीमा उपभोक्ताको सहभागिता बढाउने र बिल लिने बानीलाई प्रोत्साहन गर्ने उद्देश्यले आन्तरिक राजस्व विभागले यस्तो पुरस्कार कार्यक्रम सञ्चालन गर्दै आएको छ ।

Originally published on abcnews.com.np.