मकवानपुर, भदौ ४ गते । बागमती प्रदेशको नयाँ मुख्यमन्त्रीमा किरण थापा मगर नियुक्त हुने भएका छन् । प्रदेश प्रमुखको कार्यालय, हेटौँडाले बिहीबार अपराह्न थापा मगरलाई मुख्यमन्त्री नियुक्त गरी शपथ गराउने कार्यक्रम तय गरेको छ ।

नेपाल कम्युनिस्ट पार्टी (एमाले), नेपाल कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थनमा थापा मगर मुख्यमन्त्री बन्न लागेका हुन् । प्रदेश प्रमुखको कार्यालयले संविधानको धारा १६८ को उपधारा (२) बमोजिम उनलाई मुख्यमन्त्री नियुक्त गर्न लागेको जनाएको छ ।

प्रदेश प्रमुखको कार्यालयका शाखा अधिकृत डा. अर्जुन आचार्यका अनुसार तीन दलको समर्थनसहित थापा मगरलाई मुख्यमन्त्री नियुक्त गर्न निवेदन प्राप्त भएको छ । कार्यालयका अनुसार उनलाई बिहीबार अपराह्न ४ः०५ बजे मुख्यमन्त्री नियुक्त गरिनेछ भने ४ः२० बजे शपथ ग्रहण गराउने कार्यक्रम छ ।

यसअघि प्रदेश प्रमुख दीपकप्रसाद देवकोटाले प्रदेशसभामा कुनै पनि दलको स्पष्ट बहुमत नरहेको अवस्थामा संविधानको धारा १६८ को उपधारा (२) बमोजिम दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्री नियुक्त गर्ने प्रयोजनका लागि बिहीबार अपराह्न ४ बजेसम्म दाबी पेस गर्न आह्वान गरेका थिए ।

सोहीअनुसार एमाले, नेकपा र राप्रपाले थापा मगरलाई मुख्यमन्त्री नियुक्त गर्न समर्थनसहितको दाबी पेस गरेका हुन् ।

थापा मगरले यसअघि बागमती प्रदेश सरकारमा स्वास्थ्यमन्त्रीको जिम्मेवारी सम्हालिसकेका छन् । उनको नियुक्तिसँगै बिहीबार नै नयाँ मन्त्रिपरिषद् गठन गर्ने तयारीसमेत गरिएको छ ।

Originally published on abcnews.com.np.