काठमाडौं । राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले अख्तियार दुरुपयोग अनुसन्धान आयोगमाथि राज्यका कुनै पनि निकायले हस्तक्षेप गर्न नहुने बताएका छन् ।

बिहीबार सिंहदरबारमा बसेको राज्यव्यवस्था तथा सुशासन समितिको बैठकमा बोल्दै सिंहले अख्तियार प्रधानमन्त्री तथा मन्त्रिपरिषद्को कार्यालयअन्तर्गतको शाखा नभई संवैधानिक निकाय भएकाले त्यसको काममा हस्तक्षेप गर्न नमिल्ने बताएका हुन् ।

यद्यपि, उनले अख्तियार आफैँ विचौलियाको संरक्षण गर्ने केन्द्रजस्तो बनेको आरोप लगाए । पूर्वगृहसचिवसमेत रहेका अख्तियारका प्रमुख आयुक्तले प्रशासनिक र संवैधानिक पदको पदीय मर्यादा तथा दायित्वबीचको अन्तर छुट्याउन नसकेको उनको टिप्पणी थियो ।

सिंहले विगतमा कर्मचारीहरू कारबाहीबाट जोगिन अख्तियार जाने गरेको भए पनि अहिले अनुचित लाभ लिन जाने अवस्था बनेको आरोप लगाए ।

संविधानले नै अख्तियारलाई भ्रष्टाचार तथा सम्पत्ति छानबिनको अधिकार दिएको उल्लेख गर्दै उनले पटकपटक नयाँ आयोग गठन गर्नुको औचित्यमाथि समेत प्रश्न उठाए ।

राज्यकोषबाट तलब, भत्ता वा पेन्सन लिने मन्त्री, सांसद, मेयर तथा प्रशासक जोसुकैको सम्पत्ति छानबिन गर्ने जिम्मेवारी अख्तियारले प्रभावकारी रूपमा पूरा गर्नुपर्नेमा उनले जोड दिए ।

बैठकमा सहभागी अन्य सांसदहरूले पनि अख्तियारको भूमिका र कार्यसम्पादनप्रति प्रश्न उठाएका थिए ।

Originally published on abcnews.com.np.