निर्माण उपभोक्ता समितिका अध्यक्ष विजय दरैले तालमा पानी भरिन थालेसँगै आन्तरिक पर्यटकको चहलपहल बढ्न थालेको बताए। तालको दृश्य आकर्षक बनेपछि स्थानीयसँगै बाहिरी क्षेत्रका मानिससमेत घुम्न आउन थालेका छन्।

करिब २८ रोपनी क्षेत्रफलमा फैलिएको तालमा २५ हजारदेखि ३० हजार घनमिटर पानी भण्डारण गर्न सकिने अनुमान गरिएको छ। व्यास नगरपालिकाले नारेश्वर ताललाई गौरवको आयोजनाका रूपमा अघि बढाएको हो।

ताललाई कृषि, पर्यटन, वातावरण संरक्षण र स्थानीय रोजगारीसँग जोड्ने बहुउद्देश्यीय आयोजनाका रूपमा विकास गर्ने योजना रहेको अध्यक्ष दरैले बताए। तालमा आउने पर्यटकले सामाजिक सञ्जालमा फोटो तथा भिडियो सार्वजनिक गर्न थालेपछि यसको प्रचारप्रसारसमेत बढिरहेको छ।

व्यास नगरपालिकाका प्रमुख वैकुण्ठ न्यौपानेले नारेश्वर ताललाई नगरपालिकाको नयाँ आन्तरिक पर्यटकीय गन्तव्यका रूपमा विकास गर्ने योजना रहेको बताए। पानी भरिएपछि तालको प्राकृतिक सौन्दर्य थप आकर्षक हुने भएकाले जलविहार, वनभोजस्थललगायत पर्यटकीय पूर्वाधार निर्माण गर्ने तयारी गरिएको उनले जानकारी दिए।

ताल आसपास आवश्यक संरचना विकास गर्न सके स्थानीय तथा बाह्य पर्यटकको आवागमन बढ्ने र त्यसबाट होटल, रेष्टुरेन्ट, स्थानीय उत्पादन बिक्री तथा अन्य सेवामूलक व्यवसाय विस्तार हुने अपेक्षा गरिएको छ।

वडाध्यक्ष खेमराज पोख्रेलका अनुसार तालसँगै सिँचाइ ट्याङ्कीसमेत निर्माण गरिएको छ। तालमा जम्मा भएको पानी तानेर नजिकका कृषि क्षेत्रमा वितरण गर्ने व्यवस्था मिलाइनेछ। यसबाट दुम्सीचौर आसपासका किसानलाई सिँचाइ सुविधा पुग्ने अपेक्षा गरिएको छ।

नारेश्वर ताल व्यास नगरपालिका र गण्डकी प्रदेश सरकारको संयुक्त साझेदारीमा निर्माण गरिएको हो। आयोजनाको अनुमानित लागत करिब चार करोड रुपैयाँ रहेको छ।

सिँचाइसँगै कृषि उत्पादन बढाउने लक्ष्य

नारेश्वर ताल निर्माणको प्रमुख उद्देश्य स्थानीय कृषि क्षेत्रलाई आवश्यक सिँचाइ सुविधा उपलब्ध गराउनु पनि हो। वर्षाको पानीमा मात्र निर्भर भएर खेती गर्नुपर्ने अवस्था अन्त्य गर्दै नियमित सिँचाइको व्यवस्था गर्न सके कृषि उत्पादन बढाउन सहयोग पुग्ने वडाध्यक्ष पोख्रेलले बताए।

तालको पानी कृषि क्षेत्रमा उपयोग भएपछि किसानले तरकारी तथा अन्य बालीको उत्पादन बढाउन सक्ने अपेक्षा गरिएको छ। यसले स्थानीय कृषि अर्थतन्त्रलाई समेत बलियो बनाउने विश्वास गरिएको छ।

नगरप्रमुख न्यौपानेले नारेश्वर ताललाई केवल कृत्रिम जलाशयका रूपमा नभई कृषि, पर्यटन, वातावरण संरक्षण र रोजगारी सिर्जनालाई एकैसाथ अघि बढाउने आधारका रूपमा विकास गर्न खोजिएको बताए।

तालमा पानी भरिँदै जाँदा अहिले देखिन थालेको पर्यटकीय आकर्षणलाई व्यवस्थित पूर्वाधारसँग जोड्न सके नारेश्वर आगामी दिनमा व्यास नगरपालिकाको नयाँ गन्तव्य बन्ने अपेक्षा गरिएको छ।