जनकपुरधाम । बाराको जितपुरसिमरा उपमहानगरपालिका–२ भक्तिनगरमा तीन वर्षीया बालिकाको हत्या भएको घटनामा प्रहरीले दुई जनालाई पक्राउ गरेको छ। प्रारम्भिक अनुसन्धानका क्रममा बालिकालाई चकलेटको प्रलोभन देखाएर लगिएको र त्यसपछि हत्या गरिएको खुलेको प्रहरीले जनाएको छ।

साउन २ गते साँझ करिब ५ः४५ बजे भक्तिनगरस्थित वीरबहादुर रोकाको टायलले छाएको एकतले घरको खाली कोठामा बालिका मृत अवस्थामा फेला परेकी थिइन्। घटना लगत्तै इलाका प्रहरी कार्यालय सिमराबाट प्रहरी नायब निरीक्षक दिलिप क्षेत्रीको कमाण्डमा ‘सोको’ सहितको टोली घटनास्थल पुगेको थियो।

जिल्ला प्रहरी कार्यालय बाराबाट प्रहरी निरीक्षक नरेन्द्र कुँवरको कमाण्डमा थप टोली परिचालन गरी घटनास्थल सुरक्षित राखेर अनुसन्धान अघि बढाइएको प्रहरीले जनाएको छ। अनुसन्धानका क्रममा मृतक बालिका जितपुरसिमरा–२ दसधुरीकी तीन वर्षीया रहेको खुलेको हो।

चकलेटको प्रलोभन देखाएर लगेको आरोप

प्रहरीका अनुसार बालिका साउन ३१ गते बिहान करिब ८ः३० बजे घरबाट हराएकी थिइन्। खोजीका क्रममा अनुसन्धान गर्दै जाँदा ना.१ ज ७७५८ नम्बरको म्याजिकका सहचालक सुमन थापाले चकलेट दिने प्रलोभन देखाएर बालिकालाई घटनास्थलसम्म लगेको खुलेको जिल्ला प्रहरी कार्यालय बाराले जनाएको छ।

मंगलबार साँझ प्रहरीले तालिमप्राप्त कुकुरसहित घटनास्थलमा अनुसन्धान गरिरहेको थियो। त्यतिबेला सहचालक थापा पनि प्रहरीलाई शव खोज्न सहयोग गरिरहेको जस्तो देखिएका थिए। सोही क्रममा कुकुरले थापातर्फ संकेत गरेपछि उनलाई घटनास्थलबाटै नियन्त्रणमा लिइएको प्रहरीले जनाएको छ।

चालक पनि पक्राउ

प्रहरीका अनुसार थापाले बालिकामाथि जबर्जस्ती करणीपछि हत्या गरेको स्वीकार गरेका छन्। घटनामा म्याजिक चालकको समेत संलग्नता देखिएपछि जितपुरसिमरा–१ का २४ वर्षीय प्रमोद चौधरीलाई पनि पक्राउ गरिएको छ।

प्रहरीले चौधरीविरुद्ध जबर्जस्ती करणी तथा कर्तव्य ज्यानसम्बन्धी कसुरमा मुद्दा दर्ता गरी अनुसन्धान अघि बढाएको जनाएको छ।

घटनामा अन्य व्यक्तिको संलग्नता भए–नभएको विषयमा समेत अनुसन्धान भइरहेको छ। थप प्रमाण संकलनका लागि नेपाल प्रदेश प्रहरी कार्यालय वीरगन्जबाट तालिमप्राप्त कुकुरसहितको टोली परिचालन गरिएको प्रहरीले जनाएको छ।

Originally published on abcnews.com.np.