मुस्ताङ । उपल्लो डोल्पाबाट मुस्ताङको जोमसोममा बिक्रीका लागि ल्याइएका याकको माग बढ्दै गएको छ। पछिल्लो समय डोल्पाली याक प्रतिगोटा औसतमा एक लाख ५० हजार रुपैयाँभन्दा बढीमा खरिद–बिक्री हुन थालेका छन्।

स्थानीय व्यापारीका अनुसार मुस्ताङमा डोल्पाबाट ल्याइएका याकप्रति आकर्षण बढेको छ। तिब्बती सीमाक्षेत्र नजिक रहेको मुस्ताङमा याकको आर्थिक तथा व्यावसायिक महत्वसमेत उच्च छ।

याकलाई हिमाली क्षेत्रमा भार बोक्न प्रयोग गरिनुका साथै दूध र मासु उत्पादनका लागि पनि पाल्ने गरिन्छ। डोल्पाबाट ल्याइएका याक स्वस्थ र काम गर्ने क्षमता राम्रो हुने भएकाले स्थानीयस्तरमा तिनको माग बढेको व्यापारीहरू बताउँछन्।

तस्बिरकार सुन्दरकुमार थकालीका अनुसार डोल्पाबाट ल्याइएका याकहरू पछिल्लो समय जोमसोम बजारमा बिक्री हुन थालेका छन्। याकको खरिद–बिक्री बढेसँगै यसले स्थानीय अर्थतन्त्रमा समेत सकारात्मक प्रभाव पार्ने अपेक्षा गरिएको छ।

व्यापारीका अनुसार माग बढेसँगै याकको मूल्यसमेत वृद्धि भएको छ। हाल एकतिहाइभन्दा बढी याक एक लाख ५० हजार रुपैयाँभन्दा माथिको मूल्यमा बिक्री भइरहेको बताइएको छ।

Originally published on abcnews.com.np.