काठमाडौं । नेपालमा सीमित सवारीसाधन आयातकर्ता तथा व्यवसायीको पहलमा सन् १९७५ मा स्थापना भएको नाडा अटोमोबाइल्स एसोसिएसन अफ नेपालले ५० वर्ष पूरा गरेको छ । संस्थाले आफ्नो स्वर्ण जयन्तीको अवसरमा १८औँ नाडा अटो शो आयोजना गर्ने भएको छ ।

‘एचपी ल्युब्रिकेन्ट्स प्रिजेन्ट्स १८औँ नाडा अटो शो २०२६’ भदौ ९ देखि १४ गतेसम्म काठमाडौंको भृकुटीमण्डप प्रदर्शनी हलमा सञ्चालन हुनेछ । आयोजकका अनुसार प्रदर्शनीमा करिब तीन लाख वर्गफिट क्षेत्रफलमा २०० भन्दा बढी स्टल रहनेछन् ।

अटो शोमा २३ वटा चारपांग्रे यात्रुवाहक सवारी ब्रान्ड, १७ वटा साना तथा मझौला व्यावसायिक सवारी ब्रान्ड र १३ वटा दुईपांग्रे ब्रान्ड सहभागी हुनेछन् ।

त्यस्तै, पाट्र्स, टायर, ब्याट्री, ल्युब्रिकेन्ट, चार्जिङ पूर्वाधार तथा ग्यारेज उपकरणसँग सम्बन्धित करिब ७० कम्पनीको सहभागिता रहनेछ । १० वटा बैंक, वित्तीय संस्था तथा बीमा कम्पनी पनि प्रदर्शनीमा सहभागी हुने आयोजकले जनाएको छ ।

पाँच दशकमा अटोमोबाइल क्षेत्रको विस्तार

नाडाको पाँच दशक लामो यात्रासँगै नेपालमा अटोमोबाइल क्षेत्रले पनि उल्लेख्य विस्तार गरेको छ । हालसम्म नेपालमा करिब ५५ लाख सवारीसाधन दर्ता भइसकेका छन् ।

पछिल्ला पाँच आर्थिक वर्षमा मात्रै नेपालले करिब ४७० अर्ब रुपैयाँ बराबरका सवारीसाधन तथा सम्बन्धित सामग्री आयात गरेको छ । यसबाट राज्यले करिब ३५१ अर्ब रुपैयाँ भन्सार राजस्व प्राप्त गरेको नाडाले जनाएको छ ।

अटोमोबाइल क्षेत्रले सवारीसाधनको आयात तथा बिक्रीसँगै रोजगारी सिर्जना, राजस्व संकलन, व्यवसाय विस्तार र समग्र आर्थिक गतिविधिमा महत्वपूर्ण योगदान पुर्‍याउँदै आएको छ ।

विद्युतीय सवारीतर्फ बढ्दो आकर्षण

नेपालको अटोमोबाइल बजार पछिल्लो समय विद्युतीय सवारीसाधनतर्फ पनि तीव्र रूपमा अघि बढिरहेको छ । हालसम्म करिब ६३ हजार विद्युतीय सवारीसाधन नेपाल भित्रिइसकेको जनाइएको छ ।

विद्युतीय सवारीसाधनको प्रयोग बढेसँगै देशभर करिब दुई हजार चार्जिङ स्टेसनको सञ्जाल तयार भएको नाडाले जनाएको छ । यसले नेपालमा हरित तथा दिगो यातायात प्रणालीको विकासका लागि आधार तयार गरिरहेको छ ।

नाडाका अध्यक्ष सुरेन्द्रकुमार उप्रेतीले स्वर्ण जयन्ती संस्करणको अटो शो एउटा संस्थाको उत्सवमा मात्र सीमित नभई नेपाली अटोमोबाइल उद्योगको पाँच दशकको योगदानको समीक्षा गर्ने अवसर भएको बताए ।

उनका अनुसार ५० वर्षको यात्रालाई बिक्रीको मात्र आधारमा नभई उद्योगले कति रोजगारी, राजस्व, प्रविधि र आर्थिक गतिविधि धानेको छ भन्ने दृष्टिले मूल्यांकन गर्नुपर्ने समय आएको छ ।

नाडाले अटोमोबाइल क्षेत्रलाई आयात र बिक्रीमा मात्र सीमित नराखी रोजगारी सिर्जना, राजस्व वृद्धि, हरित प्रविधिको विस्तार तथा आर्थिक चलायमानताको प्रमुख क्षेत्रका रूपमा विकास गर्न नेतृत्वदायी भूमिका खेल्दै आएको जनाएको छ ।

स्वर्ण जयन्तीको अवसरमा आयोजना हुन लागेको अटो शोले नेपाली अटोमोबाइल क्षेत्रलाई थप आधुनिक, सुरक्षित, प्रविधिमैत्री तथा वातावरणमैत्री दिशातर्फ अघि बढाउन नयाँ बहस र अवसर सिर्जना गर्ने अपेक्षा गरिएको छ।

Originally published on abcnews.com.np.