कास्की । प्रधानमन्त्री वालेन्द्र शाह (बालेन) कास्कीको माछापुच्छ्रे गाउँपालिका–६, अस्तामस्थित अन्नपूर्ण इको रिसोर्ट पुगेका छन्। सडकमार्ग हुँदै रिसोर्ट पुगेका प्रधानमन्त्री शाह आज राति त्यहीँ बस्ने भएका छन्।

रिसोर्ट सञ्चालक विश्व अधिकारीका अनुसार प्रधानमन्त्री शाहका लागि यसअघि नै रिसोर्टका कोठाहरू बुक गरिएको थियो। यद्यपि, प्रधानमन्त्रीको बसाइ र खानपानसँग सम्बन्धित विस्तृत विवरण भने सार्वजनिक गर्न उनले अस्वीकार गरेका छन्।

प्रधानमन्त्रीको आगमनसँगै रिसोर्टमा नेपाली सेना र नेपाल प्रहरीको टोली परिचालन गरिएको छ। सुरक्षा संवेदनशीलतालाई ध्यानमा राख्दै बाह्य व्यक्तिलाई रिसोर्ट परिसरमा प्रवेशमा रोक लगाइएको छ।

रक्षामन्त्रीसमेत रहेका प्रधानमन्त्री शाहको यो भ्रमण निजी भ्रमणका रूपमा रहेको बताइएको छ। उनी सपरिवार पोखरा आएको जनाइएको छ।

शनिबार मुस्ताङ जाने

सुरक्षा स्रोतका अनुसार प्रधानमन्त्री शाह शनिबार मुस्ताङ जाने कार्यक्रम तय भएको छ। यद्यपि, मुस्ताङमा हुने उनको कार्यक्रम तथा भ्रमणको उद्देश्यबारे विस्तृत जानकारी सार्वजनिक गरिएको छैन।

प्रधानमन्त्रीको निजी भ्रमण भएकाले उनको बसाइ तथा अन्य कार्यक्रमलाई गोप्य राखिएको बताइएको छ। रिसोर्ट वरपर सुरक्षा व्यवस्था कडा बनाइएको छ।

Originally published on abcnews.com.np.