काठमाडौं । नेपाली कांग्रेसको अनुशासन समितिले पूर्वसभापति शेरबहादुर देउवालाई चुनदेवीमा सभापतिको हैसियतमा प्रस्तुत गरिएको भन्दै आपत्ति जनाएको छ।

सानेपामा आज बसेको समितिको बैठकपछि संयोजक तारामान गुरुङले पार्टीको लेटरप्याड अनधिकृत रूपमा प्रयोग गरिएको विषयमा समेत गम्भीर ध्यानाकर्षण भएको बताए।

उनका अनुसार चुनदेवीमा देउवाको अगाडि ‘सभापति’ उल्लेख गरिएको नेमप्लेट राखिनुका साथै पार्टीको लेटरप्याडमा पनि सभापतिको रूपमा सम्बोधन गरिएको थियो।

‘सभापतिको नेमप्लेट टेबलमा राखेर शेरबहादुर दाइलाई आसन ग्रहण गराइएको छ। उहाँ निवर्तमान सभापति हुनुहुन्छ। पार्टीको विधानसम्मत ढङ्गबाट जाँदा उहाँलाई सभापति भन्न सकिन्न,’ गुरुङले भने।

उनले देउवा समूहलाई पार्टीको आधिकारिक लेटरप्याड प्रयोग गर्ने अधिकार नभएको दाबी गरे। ‘पार्टीको लेटरप्याडमै सभापति लेखेर सम्बोधन गरिएको छ। उहाँहरूसँग त्यो लेटरप्याड प्रयोग गर्ने अधिकार छैन,’ उनले भने।

देउवा समूहबाट पार्टीका नेता तथा कार्यकर्तामाथि आरोप–प्रत्यारोप र आक्षेपपूर्ण अभिव्यक्ति दिइएको भन्दै त्यसप्रति पनि समितिको ध्यानाकर्षण भएको गुरुङले बताए।

‘उहाँहरूले सभापतिलगायत पार्टीका नेता तथा कार्यकर्तामाथि आँच आउने गरी घोचपेच गर्नुभएको छ। त्यो गलत छ। विभिन्न आरोप लगाइएको छ। ती शब्दहरूप्रति अनुशासन समिति, पार्टी र आमजनताले नियालेर हेरिरहेका छन्,’ उनले भने।

देउवा समूहबाट भइरहेका गतिविधि अनुशासन समितिले अभिलेखका लागि सङ्कलन गरिरहेको पनि गुरुङले जानकारी दिए। ‘चुनदेवीदेखि लिएर सुकेधारासम्मका कागजपत्रहरू पनि आएका छन्। हामी अध्ययन गर्दै छौँ,’ उनले भने।

कांग्रेसले ७७ वटै जिल्लामा निर्वाचन अधिकृत तोकेर महाधिवेशन प्रक्रिया अघि बढाइसकेको उनले बताए। महाधिवेशन सम्पन्न गर्नुअघि देशभरबाट प्राप्त ७५४ वटा उजुरी किनारा लगाउने गरी समितिले काम गरिरहेको उनको भनाइ छ।

Originally published on abcnews.com.np.