पोखरा । प्रधानमन्त्री वालेन्द्र शाह (बालेन) शनिबार बिहान पोखराबाट स्थलमार्ग हुँदै मुस्ताङतर्फ प्रस्थान गरेका छन् । शुक्रबार राति पोखरास्थित अन्नपूर्ण इको भिलेज रिसोर्टमा बसेका उनी सरकारी गाडीमै मुस्ताङतर्फ लागेका हुन् ।

प्रधानमन्त्री शाहसँगै पर्यटनमन्त्री खड्गराज पौडेल ‘गनेस’ पनि मुस्ताङ भ्रमणमा सहभागी छन् । मन्त्री पौडेल शुक्रबार साँझ नै प्रधानमन्त्री बसेको रिसोर्टमा पुगेका थिए ।

प्रधानमन्त्री शाह काठमाडौंबाटै आएको सरकारी गाडीमा मुस्ताङतर्फ गएका हुन् । यसअघि पोखराबाट सेनाको हेलिकप्टरमार्फत मुस्ताङ जाने सम्भावना रहेको बताइए पनि उनले स्थलमार्ग रोजेका छन् ।

भ्रमण टोली

प्रधानमन्त्री शाहको भ्रमण टोलीमा पर्यटनमन्त्री पौडेलसहित अन्य सरकारी अधिकारीहरू पनि सहभागी छन् । उनको मुस्ताङको भ्रमण तालिका औपचारिक रूपमा सार्वजनिक गरिएको छैन ।

लोमन्थाङ पुग्ने क्रममा प्रधानमन्त्री शाहले त्यहाँ अमेरिकी अधिकारीहरूसँगै मुस्ताङी राजाले घोडा दौडाएको कार्यक्रम अवलोकन गर्ने बताइएको छ ।

Originally published on abcnews.com.np.