काठमाडौं । पोखराको व्यस्तताबाट केही पर रहेको कास्कीको माछापुच्छ्रे गाउँपालिका–६, अस्ताम गाउँ शुक्रबार प्रधानमन्त्री वालेन्द्र शाह (बालेन) को अप्रत्याशित आगमनले चर्चामा आयो। प्रधानमन्त्री परिवारसहित अस्तामस्थित अन्नपूर्ण इको भिलेज पुगेपछि स्थानीयवासीमा उत्साहसँगै आफ्ना वर्षौंदेखिका समस्या सरकारसमक्ष राख्ने अपेक्षा जागेको थियो।

शुक्रबार बिहानैदेखि गाउँ जाने सडकमा सुरक्षाकर्मीको चहलपहल बढेपछि स्थानीयले प्रधानमन्त्री आउन लागेको थाहा पाएका थिए। प्रधानमन्त्रीलाई प्रत्यक्ष देख्न र आफ्ना समस्या सुनाउन स्थानीय सडकछेउमा जम्मा भएका थिए।

अस्तामस्थित अन्नपूर्ण इको भिलेजमा प्रधानमन्त्री बस्ने जानकारी पाएपछि स्थानीयले गाउँको विकासमा सरकारको ध्यान जाने अपेक्षा गरेका थिए।

स्थानीय ज्ञानु अधिकारीले प्रधानमन्त्रीको आगमनले नयाँ आशा जगाएको बताइन्। उनले विगतमा विभिन्न दललाई मतदान गरे पनि अपेक्षाअनुसार विकास हुन नसकेको भन्दै नयाँ नेतृत्वबाट जनताले धेरै अपेक्षा गरेको बताइन्।

अस्तामका स्थानीयको प्रमुख समस्या खानेपानी र सडक रहेको छ। अधिकांश बासिन्दा कृषिमा निर्भर रहे पनि सिँचाइको पर्याप्त सुविधा नहुँदा उत्पादन प्रभावित हुने गरेको स्थानीय बताउँछन्।

विश्वविद्यालयका प्राध्यापक नन्दलाल अधिकारीले व्यवस्थित खानेपानी र सिँचाइको व्यवस्था गर्न सके स्थानीय कृषकले उत्पादन बढाएर पोखरा बजारमा बिक्री गर्न सक्ने बताए।

पोखराबाट नजिकै रहे पनि अस्ताम पुग्ने मुख्य सडकको अवस्था कमजोर छ। स्थानीय रामप्रसाद अधिकारीले सडक र खानेपानीको समस्या तत्काल समाधान गर्नुपर्ने बताए।

‘हाम्रो मुख्य अपेक्षा बाटो नै हो। बर्खामा त पानीको व्यवस्था हुन्छ, तर हिउँदमा काकाकुल हुनुपर्छ,’ उनले भने, ‘अप्ठ्यारो बाटोका कारण बिरामी पर्दा अस्पताल पुर्‍याउनसमेत गाह्रो हुन्छ।’

अर्का स्थानीय शोभाखर अधिकारीले प्रधानमन्त्रीको आगमनलाई गाउँका लागि अवसरका रूपमा लिँदै सडक कालोपत्र र खानेपानीको व्यवस्था गरिदिन आग्रह गरे।

‘अहिलेसम्म यहाँ कुनै प्रधानमन्त्री आउनुभएको थिएन। अहिले बालेनज्यू आउनुभएको छ। उहाँले हाम्रो अप्ठ्यारो बाटो कालोपत्र गरिदिए र पानीको धारा जोडिदिए गाउँलेका लागि ठूलो कल्याण हुने थियो,’ उनले भने।

पर्यटकीय सम्भावनाले भरिएको अस्ताममा माछापुच्छ्रे, अन्नपूर्ण, मनास्लु र धौलागिरि हिमशृंखलाको दृश्यावलोकन गर्न सकिन्छ। स्थानीयका अनुसार शीतल हावापानी, प्राकृतिक गुफा तथा ओडार र मनोरम भूगोलका कारण अस्ताम योग, ध्यान तथा प्रकृति पर्यटनका लागि आकर्षक गन्तव्य बन्न सक्छ।

स्थानीयले प्राकृतिक सम्पदाको संरक्षणसँगै उच्च पर्वतीय खेलकुदका पूर्वाधार निर्माण गर्न सके गाउँको पर्यटन प्रवर्द्धनमा थप सहयोग पुग्ने बताएका छन्।

प्रधानमन्त्रीको भ्रमणका क्रममा स्थानीयले विकासका विषयसँगै सुशासन, शान्ति सुरक्षा र न्याय प्रणालीप्रति पनि अपेक्षा व्यक्त गरेका छन्। स्थानीय ज्ञानु अधिकारीले महिला तथा बालिकामाथि हुने हिंसा र जघन्य अपराध नियन्त्रणका लागि कडा कानुन कार्यान्वयन गर्नुपर्ने बताइन्।

प्रधानमन्त्रीको छोटो भ्रमण भए पनि त्यसले अस्तामका स्थानीयमा आफ्नो गाउँका समस्या सरकारको उच्च तहसम्म पुग्ने आशा जगाएको छ। स्थानीयवासीले अब भ्रमणलाई विकास निर्माणका ठोस कामसँग जोडेर हेरेका छन्।

Originally published on abcnews.com.np.