काठमाडौँ । मलेसियामा नेपाली कामदार पठाउन छनोट भएका २५ वटा म्यानपावर कम्पनीलाई सरकारले छलफलका लागि बोलाएको छ। युवा, श्रम तथा रोजगार मन्त्रालयले मलेसिया रोजगारीका लागि सूचीकृत २५ म्यानपावर कम्पनी र नेपाल वैदेशिक रोजगार व्यवसायी संघका प्रतिनिधिलाई भोलि छलफलमा बोलाएको हो।

एक म्यानपावर व्यवसायीका अनुसार मलेसिया सरकारले नेपालबाट कामदार लैजान २५ वटा म्यानपावर कम्पनी छनोट गरेपछि त्यसबारे छलफल गर्न मन्त्रालयले बोलाएको हो। मलेसियामा नेपाली कामदार पठाउने जिम्मेवारी सीमित म्यानपावरलाई मात्र दिने निर्णयप्रति वैदेशिक रोजगार व्यवसायीहरूले विरोध गर्दै आएका छन्। यसअघि पनि केही म्यानपावर व्यवसायीले मलेसिया रोजगारीमा सिन्डिकेट लागू गर्न खोजिएको भन्दै आपत्ति जनाएका थिए।

गत शनिबार मलेसिया सरकारले नेपालबाट कामदार भर्नाका लागि २५ वटा नेपाली म्यानपावर कम्पनीलाई छनोट गरेको थियो। छनोटमा परेका कम्पनीहरूमा इन्डो अबर म्यानपावर, संयोग ओभरसिज, ट्यालेन्ट ओभरसिज सर्भिसेस, वाइड स्पेस इन्टरनेसनल, खोजी रिक्रुटमेन्ट सर्भिसेस, एएनएस एसोसिएट्स र अल–हायात म्यानेजमेन्ट सिस्टम रहेका छन्।

त्यस्तै, अल स्किल्स इन्टरनेसनल ह्युमन रिसोर्स, बिलिभेबल ओभरसिज, डी स्क्वायर्ड ग्रुप, डी.डी. ह्युमन रिसोर्स, पारामाउन्ट इम्प्लोइमेन्ट कन्सल्टेन्सी, फ्रन्टलाइन रिक्रुटमेन्ट प्रालि, लालधनुष इन्टरनेसनल सर्भिस प्रालि, नेपाल प्लेसमेन्ट एजेन्सी, द रिभर ओभरसिज प्रालि, एसिया लिङ्क सर्भिसेज, ट्रस्ट नेपाल ओभरसिज, एक्सेस पार्टनर्स, बीएम ओभरसिज, ह्वाइट हर्स इन्टरनेसनल, ट्रेन्स एसिया इन्टिग्रेटेड सर्भिसेस, मोन्टेज ओभरसिज, नेपाल एचआर सोलुसन र स्काई पावर इन्टरनेसनल सर्भिस रहेका छन्।

Originally published on abcnews.com.np.