हेटौँडा । राष्ट्रिय प्रजातन्त्र पार्टी (राप्रपा) वाग्मती प्रदेश संसदीय दलले मुख्यमन्त्री किरण थापामगरले माग गर्ने विश्वासको मतको पक्षमा मतदान गर्न आफ्ना प्रदेशसभा सदस्यलाई ह्वीप जारी गरेको छ ।

राप्रपा वाग्मती प्रदेश संसदीय दलका प्रमुख सचेतक डम्बर तामाङले जारी गरेको पत्रमार्फत प्रदेशसभा बैठकमा अनिवार्य उपस्थित भई मुख्यमन्त्री थापामगरले प्रस्तुत गर्ने विश्वासको मतसम्बन्धी प्रस्तावको पक्षमा मतदान गर्न सांसदहरूलाई निर्देशन दिइएको हो ।

पत्रमा भदौ ७ गते बसेको दलको बैठकको निर्णय, संसदीय दलका नेताको आदेश तथा राप्रपा संसदीय दलको विधानअनुसार ह्वीप जारी गरिएको उल्लेख छ ।

यसअघि राप्रपाकै प्रमुख सचेतक कुमारी तामाङले भने मुख्यमन्त्री थापाको विश्वासको मतको विपक्षमा मतदान गर्न वा तटस्थ बस्न निर्देशन दिएकी थिइन् । एउटै दलबाट विश्वासको मतका विषयमा दुई फरक निर्देशन आएपछि राप्रपाभित्रको विवाद थप पेचिलो बनेको छ ।

मुख्यमन्त्री थापाले आज दिउँसो १ बजे बस्ने वाग्मती प्रदेशसभा बैठकमा विश्वासको मत लिँदैछन् । उनलाई विश्वासको मत प्राप्त गर्न ५३ सांसदको समर्थन आवश्यक पर्नेछ ।

वाग्मती प्रदेशसभामा नेकपा (एमाले)का २५ र नेपाली कम्युनिस्ट पार्टी (नेकपा)का २६ गरी ५१ सांसद मुख्यमन्त्री थापाको पक्षमा रहेको बताइएको छ । त्यसैले थप समर्थनका लागि राप्रपाको मत निर्णायक हुने देखिएको छ ।

नेपाली कांग्रेसले भने मुख्यमन्त्री थापाको विपक्षमा मतदान गर्ने जनाएको छ ।

मुख्यमन्त्री थापाले विश्वासको मत पाउने वा नपाउने विषयमा राप्रपाका सांसदको निर्णय महत्वपूर्ण हुने भएकाले आजको प्रदेशसभा बैठकलाई चासोका साथ हेरिएको छ ।

Originally published on abcnews.com.np.