हेटौँडा । बागमती प्रदेशका मुख्यमन्त्री किरण थापा मगरको नियुक्ति बदर गर्न माग गर्दै उच्च अदालत हेटौँडा इजलासमा दायर भएका दुई वटा रिटमाथि आज सुनुवाइ हुँदै छ।

दुवै रिटमाथि न्यायाधीश बविता उप्रेतीको एकल इजलासमा पेसी तोकिएको छ। मुख्यमन्त्री नियुक्तिको प्रक्रिया संविधानविपरीत रहेको दाबी गर्दै अधिवक्ता मोहनप्रसाद ढकाल र राष्ट्रिय प्रजातन्त्र पार्टी (राप्रपा) बागमती प्रदेशसभा संसदीय दलकी प्रमुख सचेतक कुमारी तामाङले छुट्टाछुट्टै रिट दायर गरेका हुन्।

दुवै रिट भदौ ५ गते दर्ता भएका थिए।

रिट निवेदनमा राप्रपा बागमती प्रदेशसभा संसदीय दलका नेता उद्धव थापाले पार्टीको नीति, निर्णय र निर्देशनविपरीत मुख्यमन्त्री नियुक्तिका लागि समर्थन दिएको दाबी गरिएको छ। राप्रपाको केन्द्रीय नेतृत्वले उक्त समर्थन आधिकारिक नभएको जानकारी प्रदेश प्रमुखको कार्यालयलाई गराइसकेको अवस्थामा पनि सोही समर्थनलाई आधार बनाएर मुख्यमन्त्री नियुक्त गरिएको भन्दै नियुक्ति बदर गर्न माग गरिएको छ।

रिटमा प्रदेश प्रमुखको कार्यालय, प्रदेश प्रमुख दीपकप्रसाद देवकोटा, मुख्यमन्त्री तथा मन्त्रिपरिषद्को कार्यालय, बागमती प्रदेशसभा, सभामुख, मुख्यमन्त्री किरण थापा मगर, उद्धव थापा, नेकपा (एमाले) संसदीय दलका नेता जगन्नाथ थपलिया तथा नेपाली कम्युनिस्ट पार्टी (नेकपा) संसदीय दलका नेता शालिकराम जम्कट्टेललाई विपक्षी बनाइएको छ।

प्रदेश प्रमुख देवकोटाले नेपालको संविधानको धारा १६८ को उपधारा (२) अनुसार भदौ ४ गते एमाले संसदीय दलका नेता किरण थापा मगरलाई बागमती प्रदेशको मुख्यमन्त्री नियुक्त गरेका थिए।

यसैबीच, मुख्यमन्त्री थापा मगरले आज प्रदेशसभाबाट विश्वासको मत लिने तयारी गरेका छन्। नियुक्तिविरुद्धका रिटमाथि सुनुवाइ हुन लागेको दिन नै विश्वासको मतको प्रक्रिया अघि बढ्न लागेपछि अदालतको आदेशलाई चासोका साथ हेरिएको छ।

प्रदेशसभा बैठक दिउँसो १ बजे बोलाइएको भए पनि विश्वासको मतको प्रक्रिया सुरु हुन सकेको छैन।

उच्च अदालत हेटौँडा इजलासका उपरजिस्ट्रार बद्रिप्रसाद लामिछानेका अनुसार रिट पेसीमा चढ्दैमा सरकारको कामकाज वा विश्वासको मत प्रक्रिया स्वतः रोकिने छैन।

‘आदेश जारी नभएसम्म सरकारको कामकाज रोकिँदैन,’ उनले भने, ‘आजको विश्वासको मतलगायत सरकारका अन्य कार्यक्रम पेसी चढेकै कारण रोकिन्नन्। अदालतबाट कस्तो आदेश आउँछ, त्यसले मात्रै फरक पार्छ।’

अब उच्च अदालतको आदेश र प्रदेशसभामा हुने विश्वासको मतको परिणामले बागमती प्रदेशको सत्ता राजनीतिले कुन मोड लिन्छ भन्ने विषय थप चासोको केन्द्रमा रहेको छ।

Originally published on abcnews.com.np.