काठमाडौं । नेपाली कांग्रेसका सांसद भरतबहादुर स्वाँरले नेपालमा लगानीमैत्री वातावरण निर्माणका लागि सरकार पर्याप्त रूपमा गम्भीर नभएको आरोप लगाएका छन्।

सोमबार बसेको प्रतिनिधिसभाअन्तर्गत पूर्वाधार विकास समितिको बैठकमा पूर्वाधार विकास तथा सार्वजनिक–निजी साझेदारीसम्बन्धी विषयमा भएको छलफलका क्रममा सांसद स्वाँरले स्वदेशी तथा विदेशी लगानी आकर्षित गर्न सरकारले नीतिगत र प्रशासनिक सुधारमा गम्भीरता देखाउनुपर्ने बताएका हुन्।

उनले उद्योग स्थापना तथा सञ्चालनका क्रममा व्यवसायीले विभिन्न सरकारी निकाय धाउनुपर्ने, अनावश्यक प्रशासनिक झन्झट व्यहोर्नुपर्ने र कमिसनको समस्यासमेत सामना गर्नुपर्ने अवस्था रहेको दाबी गरे। प्रभावकारी ‘एकद्वार प्रणाली’को अभावले लगानीकर्तालाई निरुत्साहित बनाइरहेको उनको भनाइ थियो।

लगानी गर्न आउने उद्योगी तथा व्यवसायीलाई विभिन्न निकायका ढोका–ढोका धाउनुपर्ने अवस्थाको अन्त्य गर्नुपर्नेमा उनले जोड दिए। विगतमा नेपालमा स्थापना भएका कतिपय उद्योग बन्द हुनु र स्वदेशी पुँजीसमेत विदेश पलायन हुनु गम्भीर चिन्ताको विषय भएको उनले बताए।

विदेशी तथा मित्रराष्ट्रको सहयोगमा स्थापना भएका उद्योगसमेत प्रभावकारी रूपमा सञ्चालन गर्न नसक्नु देशका लागि लज्जास्पद अवस्था भएको सांसद स्वाँरको भनाइ थियो। उनले छिमेकी मुलुकका वायुसेवा कम्पनीले उल्लेख्य प्रगति गरिरहँदा राष्ट्रिय ध्वजावाहक नेपाल एयरलाइन्स भने ऋणको भारमा फसिरहेको उल्लेख गरे।

उनले विगतमा विभिन्न उद्योग तथा विकास आयोजनामा देखिएका समस्या समाधान नगरे मुलुकमा लगानीको वातावरण थप बिग्रँदै जाने चेतावनी दिए। उद्योगी–व्यवसायीलाई पर्याप्त आधारबिना पक्राउ गर्ने, थुनामा राख्ने र पछि धरौटीमा छाड्ने जस्ता गतिविधिले पनि लगानीकर्तामाझ नकारात्मक सन्देश जाने उनले बताए।

निर्माण क्षेत्रमा पनि व्यवसायीले अनेक समस्या झेलिरहेको उल्लेख गर्दै उनले पहुँच र चाकडीका आधारमा योजना छनोट हुने प्रवृत्तिको अन्त्य हुनुपर्ने बताए। इमानदारीपूर्वक काम गर्ने निर्माण व्यवसायी नै कालोसूचीमा पर्ने अवस्था सिर्जना हुनु दुःखद भएको उल्लेख गर्दै उनले यसतर्फ सरकार गम्भीर हुनुपर्नेमा जोड दिए।

Originally published on abcnews.com.np.