काठमाडौँ । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले बलात्कारपछि हत्या भएका घटनासम्बन्धी प्रचलित कानुन संशोधन गर्नुपर्ने बताएका छन्।

प्रतिनिधिसभाको सोमबारको बैठकमा बोल्दै शाहीले सरकारले आवश्यक कानुनी संशोधनको मस्यौदा तयार गरी संसद्मा प्रस्तुत गर्नुपर्ने माग गरेका हुन्। उनले यस विषयमा सत्ता र प्रतिपक्षबीचको राजनीतिक विभाजनभन्दा माथि उठेर कानुन संशोधन गर्नुपर्नेमा जोड दिए।

‘बलात्कारपछि हत्याको सम्बन्धमा नेपालमा जुन प्रचलित कानुन छ, यसलाई संशोधन गर्नुपर्ने देखियो,’ उनले भने, ‘हामी सरकारलाई अपिल गर्न चाहन्छौँ, कानुनको ड्राफ्ट बनाएर ल्याउनुहोस्। हामी सत्तापक्ष र प्रतिपक्ष नभनिकन यसलाई संशोधन गरौँ र संसद्बाट पास गरौँ।’

उनले यस विषयमा बहस मात्र गरेर नबस्न र सरकारले ठोस कानुनी प्रस्ताव संसद्मा ल्याउनुपर्ने बताए।

विदेशी स्याउ आयात रोक्न आग्रह

सांसद शाहीले जुम्लालगायतका जिल्लामा उत्पादन हुने स्वदेशी स्याउले बजार नपाइरहेको विषय पनि संसद्मा उठाएका छन्।

विदेशबाट ठूलो परिमाणमा स्याउ आयात हुँदा नेपाली किसानले उत्पादन गरेको स्याउ बिक्री गर्न समस्या भएको उनको भनाइ थियो। उनले विशेषगरी भदौ र असोज महिनामा विदेशी स्याउ आयातमा रोक लगाउन कृषिमन्त्रीको ध्यानाकर्षण गराए।

शाहीले जुम्लामा स्याउ उत्पादन विस्तार र बजारीकरणका लागि सरकारले थप लगानी गर्नुपर्नेमा समेत जोड दिए।

Originally published on abcnews.com.np.