चितवन । कृषि तथा वन विज्ञान विश्वविद्यालय, रामपुरको उपकुलपति, रजिस्ट्रार र विभिन्न सङ्कायका डिनसहितको उच्चस्तरीय टोलीले विश्वविद्यालयअन्तर्गतका चार आंगिक क्याम्पसको स्थलगत निरीक्षण गर्दै शैक्षिक तथा प्रशासनिक अवस्थाबारे छलफल गरेको छ।

विश्वविद्यालयका उपकुलपति प्रा.डा. ऋषिराम कट्टेलका अनुसार टोलीले कलेज अफ नेचुरल रिसोर्स म्यानेजमेन्ट, सिन्धुली, कटारी, पाख्रिबास र बर्दिबास क्याम्पसको आकस्मिक निरीक्षण गरेको हो।

तीमध्ये कटारी क्याम्पसमा वन विज्ञानतर्फ स्नातक तहको अध्ययन–अध्यापन हुँदै आएको छ भने अन्य तीन क्याम्पसमा कृषि विज्ञानतर्फ स्नातक तहको अध्ययन सञ्चालन भइरहेको विश्वविद्यालयले जनाएको छ।

विद्यार्थी, शिक्षक र कर्मचारीसँग छलफल

निरीक्षणका क्रममा विश्वविद्यालयको टोलीले विद्यार्थी, प्राध्यापक, कर्मचारी तथा सम्बन्धित क्याम्पस प्रमुखसँग छुट्टाछुट्टै छलफल गरेको उपकुलपति कट्टेलले जानकारी दिए।

उनका अनुसार क्याम्पसहरूको भौतिक पूर्वाधार, शिक्षाको गुणस्तर, विद्यार्थी भर्ना, सुशासन, पारदर्शिता र जवाफदेहितालगायत विषयमा छलफल गरिएको थियो।

‘ती क्याम्पसको भौतिक पूर्वाधार, गुणस्तरीय शिक्षा, विद्यार्थी भर्ना, सुशासन, पारदर्शिता र जवाफदेहितालगायत विषयमा छलफल गरी सुझाव लिइएको छ,’ उपकुलपति कट्टेलले भने, ‘कतिपय समस्या तत्काल समाधान हुने प्रकृतिका भएकाले आवश्यक निर्देशनसमेत दिइएको छ।’

उपकुलपतिसहित उच्चस्तरीय टोली

अनुगमन टोलीमा उपकुलपति प्रा.डा. कट्टेलसँगै विश्वविद्यालयका रजिस्ट्रार प्रा.डा. सुबिर सिंह, कृषि सङ्कायका डिन प्रा.डा. सुन्दर तिवारी तथा वन सङ्कायका डिन प्रा.डा. गान्दिप काफ्ले सहभागी थिए।

टोलीले क्याम्पसहरूको शैक्षिक अवस्था सुधारसँगै नयाँ शैक्षिक सत्रका लागि विद्यार्थी भर्ना बढाउन प्रभावकारी प्रचारप्रसार गर्न पनि सम्बन्धित क्याम्पस प्रशासनलाई आग्रह गरेको छ।

कृषि, वनदेखि पशु चिकित्सा र मत्स्य विज्ञानसम्म अध्ययन

कृषि तथा वन विज्ञान विश्वविद्यालयमा कृषि, वन, पशु चिकित्सा तथा पशुपालन र मत्स्य विज्ञान विषयमा स्नातक तथा स्नातकोत्तर तहदेखि उच्च शिक्षासम्मको अध्ययन–अध्यापन हुँदै आएको छ।

विश्वविद्यालयले आंगिक क्याम्पसहरूको शैक्षिक गुणस्तर र पूर्वाधार सुधारलाई प्राथमिकतामा राख्दै नियमित अनुगमन तथा आवश्यक सुधारका कार्यक्रम अघि बढाउने जनाएको छ।

Originally published on abcnews.com.np.