धनगढी । शिक्षा तथा खेलकुदमन्त्री सस्मित पोखरेलले अटिज्म भएका बालबालिकाका लागि देशका सातै प्रदेशमा आवासीय विद्यालय स्थापना गरिने बताएका छन्।

शनिबार धनगढीमा ‘अटिजम तथा न्यूरोडाइभर्सिटी भएका बालबालिकाका लागि शैक्षिक कार्यक्रम सञ्चालन तथा व्यवस्थापनसम्बन्धी मापदण्ड, २०८३’ विषयमा आयोजित छलफलमा मन्त्री पोखरेलले आवासीय विद्यालय स्थापनाका लागि सरकारले बजेटसमेत विनियोजन गरिसकेको जानकारी दिए।

उनका अनुसार आवासीय विद्यालय सञ्चालनको मोडालिटी तय गर्न छलफल भइरहेको छ। विद्यालयमा विद्यार्थी र अभिभावकलाई एकै स्थानमा राखेर पठनपाठनसँगै आवश्यक थेरापी तथा रचनात्मक गतिविधि सञ्चालन गर्ने तयारी छ।

मन्त्री पोखरेलले अटिज्म भएका बालबालिकालाई मूलधारको विद्यालयमा भर्ना गर्नुअघि आवासीय विद्यालयमार्फत आवश्यक शिक्षा तथा स्वास्थ्य सेवा उपलब्ध गराउने गरी मापदण्डको मस्यौदा तयार गरिएको बताए।

“यसै वर्षदेखि विस्तृत परियोजना प्रतिवेदन (डीपीआर) बनाएर कार्यान्वयनको प्रक्रिया अगाडि बढाउँछौँ। मूलधारको विद्यालयमा भर्ना गर्नुअघि त्यस्ता बालबालिकालाई आवासीय रूपमा स्वास्थ्य सेवा र आवश्यक शिक्षा दिने गरी मापदण्डको मस्यौदा बनेको छ,” उनले भने।

उनले अटिज्मसम्बन्धी विषयलाई आगामी शिक्षा ऐन, नीति तथा मापदण्डमा समेटेर सरकारले काम गर्ने आधार थप स्पष्ट बनाउने बताए।

मन्त्री पोखरेलले पछिल्ला वर्षमा अटिज्म भएका बालबालिकाको समस्या विश्वव्यापी रूपमा बढ्दै गएको उल्लेख गर्दै उनीहरू र अभिभावकका समस्या समाधानका लागि सरकार गम्भीर रहेको बताए।

कार्यक्रममा राष्ट्रिय अटिज्म केयर सेन्टर सोसाइटीका अध्यक्ष रमेश बस्नेतले अटिज्म भएका बालबालिकालाई अन्य अपांगता भएका बालबालिकाभन्दा फरक ढंगले बुझेर उनीहरूको आवश्यकता सम्बोधन गर्नुपर्नेमा जोड दिए।

छलफल ‘अटिजम तथा न्यूरोडाइभर्सिटी भएका बालबालिकाका लागि शैक्षिक कार्यक्रम सञ्चालन तथा व्यवस्थापनसम्बन्धी मापदण्ड, २०८३’ को कार्यान्वयन र आवासीय विद्यालय सञ्चालनको मोडालिटीमा केन्द्रित थियो।

Originally published on abcnews.com.np.